Ааспыт нэдиэлэҕэ Саха Өрөспүүбүлүкэтин Духуобунаһын академиятын Бэрэсидьиэнин быыбара буолла.
Академия Устаабынан, Бэрэсидьиэн уонна вице-бэрэсидьиэн быыбара, дьиҥэр, 5 сылга биирдэ буолар. Биллэрин курдук, былырыын уочараттаах быыбарга академик Афанасий Николаевич Осипов, кистэлэҥ куоластааһынынан, хаттаан талыллыбыта. Оттон быйыл, ытыктабыллаах Афанасий Николаевич күн сириттэн барбытын кэннэ, бу – уочарата суох быыбар буолар.
СӨ Духуобунаһын академиятын Президиума Бэрэсидьиэҥҥэ уонна вице-бэрэсидьиэҥҥэ биирдии кандидатураны киллэрэр бырааптаах. Онон, Президиум, академия дьиҥнээх чилиэннэрин уопсай мунньаҕар ССРС, РФ Судаарыстыбаннай бириэмийэлэрин лауреатын, Арассыыйа норуодунай артыыһын, СӨ Өксөкүлээх Өлөксөй аатынан судаарыстыбаннай бириэмийэтин лауреатын, биллиилээх режиссер, норуот духуобунай лиидэрэ Андрей Борисов кандидатуратын киллэрбитэ.
СӨ Духуобунаһын академията 25 дьиҥнээх чилиэннээх. Уочарата суох быыбарга 20 академик кыттыыны ылла, онон куорум баар.
Кистэлэҥ куоластааһын түмүгүнэн, Андрей Саввич Борисов биир санаанан СӨ Духуобунаһын академиятын Бэрэсидьиэнинэн быыбарданна.
Оттон былырыын уочараттаах быыбарга вице-бэрэсидьиэннэринэн саха норуодунай суруйааччыта Николай Алексеевич Лугинов уонна суруналыыс, суруйааччы, чинчийээччи, “Саха сирин суруйааччылара” Ассоциация бэрэссэдээтэлэ Олег Гаврильевич Сидоров талыллыбыттара.
Татьяна МАРКОВА, edersaas.ru