“Арассыыйа чулуу ааттара” диэн аэропортарга биллиилээх дьон аатын биэрии куонкуруһун бүтэһиктээх түһүмэҕэ салҕанан бара турар. Дьокуускай аэропордугар Платон Ойуунускай аатын биэриэххэ диир дьон ахсааннара 16 тыһыынчаттан таҕыста.
Иккис – Валерий Кузьмин 6066, үһүс – Михаил Николаев 5116 уонна Петр Бекетов 1651 куолаһы ылан иһэллэр. Саха сирин дьоно-сэргэтэ бу куонкуруска хара маҥнайгыттан көхтөөхтүк кыттан иһэбит. Уһук Илин эрэгийиэннэргэ бастыҥ көрдөрүүлээхпит. Өскөтүн Магадаҥҥа, Владивостокка – 10000, Камчаткаҕа, Благовещенскайга – 7000, Хабаровскайга 16000 тахса киһи куоластаабыт буоллаҕына, биһиги 29 тыһыынча кирбиини аһардыбыт.
Оттон Арассыыйа үрдүнэн барыта 1 мөлүйүөнтэн тахса киһи куонкуруска кытынна.
Ханнык эрэгийиэн көхтөөхтүк кыттан иһэрий диэтэххэ, Башкирияҕа, билиҥҥи туругунан, 72,6 тыһ. киһи куоластаабыт. Ол кэнниттэн Татарстан (55,3 тыһ. куолас) уонна Крым (43,7 тыһ.) өрөспүүбүлүкэлэрэ иһэллэр. Башкирдар Мустай Каримнарыгар 37,4 тыһыынчаттан тахса куолаһы биэрэн олороллор. Мустай Карим – Башкирия аатырбыт суруйааччыта, поэта, драматура. Эһиил кини төрөөбүтэ 100 сылын бэлиэтиэхтээхтэр. Татарстаҥҥа, биллэн турар, Габдулла Тукай аата уостан түспэт. Кини туһатыгар татаардар 37,9 тыһ. тахса куолаһы биэрбиттэр. Габдулла Тукай – татаар норуотун поэта, уопсастыбаннай диэйэтэлэ. Татарстаннар улаханыттан кыратыгар тиийэ убаастыыр киһилэрэ. Оттон Крымҥа худуоһунньук Иван Айвазовскай аата бастаан иһэр. Кини туһатыгар 21,2 тыһ. тахса киһи куоластаабыт.
Аграфена КУЗЬМИНА, «Саха сирэ» хаһыат, edersaas.ru