Москваҕа саха атын тургутар айаҥҥа туруммут Тымныы полюһа Өймөкөөн улууһун сылгыһыттара Дугуйдан Винокуров уонна Мичил Неустроев бүгүн киэһэ Новосибирскай куоракка тиийдилэр.
Новосибирскай ипподромугар уолаттар биир дойдулаахтара, Өймөкөөн Томторуттан төрүттээх Валентина Кривошапкина уонна Уус Ньараҕа саамай айар-тутар кэмигэр олорон баран, билигин бочуоттаах сынньалаҥҥа Новосибирскайга көһөн олорор Галина Анисимова итии чэйдээх уонна сылаас бэрэскилээх көрүстүлэр.
Новосибирскай куоратын саха диаспоратын актыбыыстара биир дойдулаахтарын — Өймөкөөн сылгыһыттарын Новосибирскай куорат ипподромун гостиницатыгар олохтоотулар.
— Новосибирскайга олорор сахалар землячестволарын урбаанньыт Владислав Попов салайар. Кини Нуучча географическай уопсастыбатын Сибиир киин куоратын салаатын кытта ыкса сибээстээхтик үлэлээн, куорат бөдөҥ ипподромун салалтатын кытта кэпсэтэн, аттары уонна айанньыттары сынньатарга кэпсэппитэ, уолаттар Новосибирскайга тохтуур кэмнэригэр үлэлиир бырагыраамаларын оҥорон бэлэмнээбитэ.
Ол курдук, муус устар 14 күнүгэр 50 киһи кыттыылаах «Өймөкөөнтөн Москваҕа диэри атынан айан» диэн пресс-кэмпириэнсийэ буолуоҕа. Тэрээһини «Биир ньыгыл Арассыыйа» баартыйа эрэгийиэннээҕи салаата, Новосибирскай уобалаһын тыатын хаһаайыстыбатын министиэристибэтэ, Нуучча географическай уопсастыбатын Новосибирскайдааҕы салаата биир сүбэнэн тэрийэн ыытыахтара. Кэмпириэнсийэҕэ тыа хаһаайыстыбатын миниистирин солбуйааччы Виктор Апанасенко, ипподром дириэктэрэ Сергей Михайленко тыл этиэхтэрэ, «Өймөкөөн-Москва» туһаайыынан айан эспэдииссийэтин сыалын-соругун Мичил Неустроев, Саха сылгытын уратытын уонна бу дьиэ сүөһүтүн иитии туһунан Дугуйдан Винокуров кэпсиэхтэрэ. Тэрээһиҥҥэ Сибиир куоратын иһитиннэрэр-биллэрэр сириэстибэлэрин суруналыыстара, ааттаах-суоллах блогердар кыттыахтара, — диэн Новосибирскай куораттааҕы саха диаспоратын актыбыыһа Галина Анисимова иһитиннэрдэ.
Уолаттарбыт сылдьыбыт сирдэрин тухары бу курдук айхаллыы-уруйдуу көрсөллөр.
Елена ПОТОЦКАЯ, «Саха сирэ» хаһыат.
Хаартыска — Галина Анисимова тиксэриитэ.