«Бөөлүүн түүн Мота сэлиэнньэтигэр гостиницаҕа хонон ааспыппыт. Олохтоох сылгы баазатыгар сылгыларбытын туруордубут. Бүгүн Иркутскай кытыытыгар сытар сиргэ тиийэн хонор былааннаахпыт, сарсын куоракка тиийиэхпит», — диэн Дугуйдан Винокуров иһитиннэрдэ.
Саха айанньыттара — Дугуйдан Винокуров уонна Мичил Неустроев Саха Өрөспүүбүлүкэтэ төрүттэммитэ 100 сылыгар аналлаах айаннарын быйыл саҕалаабыттара. Айанньыттар Саха сирин Өймөкөөн улууһуттан кулун тутарга арахпыттара. Аттаахтар Саха Өрөспүүбүлүкэтин былааҕын илдьэ сылдьаллар.
Кинилэр ааһан иһэр эрэгийиэннэригэр көрсүһүүлэри ыыталлар, Саха сирин, култууратын туһунан кэпсииллэр. Саха сылгыларын миинэн Арассыыйа киин куоратыгар – Москваҕа тиийэр былааннаахтар.
Хаартыска — айанньыттар тус инстаграмнарыттан.