Маны аах Уопсастыба

Дугуйдан уонна Мичил бу бээтинсэҕэ ыраах айаҥҥа туруналлар

Бу күннэргэ Өймөкөөн улууһуттан саха атынан ыраах айаҥҥа турбут Дугуйдан Винокуров уонна Мичил Неустроев Москва куорат туһаайыытынан айанныахтара.

Айанньыттар соруктара — 2022 сылга Москваҕа ыытыллар Саха Өрөспүүбүлүкэтэ төрүттэммитэ 100 сылын бэлиэтиир ыһыахха кыттыы. Онтон салгыы, табылыннаҕына уонна сыстыганнаах дьаҥ тохтоотоҕуна, Европа куораттарынан барыахтара. Оттон дьаҥ ааспатаҕына, Москванан айаннарын түмүктүөхтэрэ. Айан сүрүн ис хоһооно — саха сылгытын ис кыаҕын көрдөрүү.

Бу нэдиэлэҕэ ыам ыйын 21 күнүгэр уолаттар Дьокуускай «Үс Хатыҥыттан» ыраах айаҥҥа турунууларын сиэрэ-туома буолуоҕа. Онно ыччаттары сиэрдээхтик атаараары, үгүс дьон Дугуйданнаах Мичилгэ көмөлөһөр ньыманы тобулар. Биир оннук ыҥырыы сурук аҕыйах чаас анараа өттүгэр батсаапка тарҕанна:

«Ыҥырыы! Уолаттарга көмөлөһүөҕүҥ, «группа поддержки» буолуоххайыҥ!

Саха хорсун санаалаах ньургун уолаттара Дугуйдан уонна Мичил иннэ-кэннэ биллибэт уһун айаҥҥа туруналлара субу кэллэ. Сайыны көрсөр үтүө бэлиэ күммүтүгэр — ыам ыйын 21 күнүгэр Дьокуускайтан аттанарга былааннаналлар. Аттарын сынньаттылар, бэрийдилэр, күүс-уох, санаа эбиннилэр. Үгүс атас-доҕор билсэн барда, алгыс анаата.

Уолаттар хотуттан кэлбиттэрин курдук бэйэлэрин үптэригэр салгыы айаҥҥа туруналлар. Онуоха саатар хармааннарыгар барар, кыра да буоллар үп хомуйуоҕуҥ, эрэл санаа кыыма охсуоххайыҥ. Дьиҥ дьоһун санаалаахтар аара көрсүөхтэрэ. Үтүө дьыаланы өйөөччүлэр көстүөхтэрэ. Оттон биһиги айаннарыгар туруналларыгар өйүүрбүтүн биллэриэҕиҥ.

Бөлөхпүт дьоно, кимиэхэ төһө кыалларынан биэс мөһөөхтөн саҕалаан уолаттарга анаан хомуйан (нүөмэрдэрин ыйбыттар) бу ый 20 күнүгэр диэри ыытыаххытын син. Биир да кэпиэйкэни аара сүтэрбэккэ аналлаах сиригэр тиэрдэргэ, отчуотун оҥорорго уопут баар. Үгүс саҥата суох дьыаланан көмөлөһүөххэ. Бээтинсэҕэ, ыам ыйын 21 күнүгэр, илиилэригэр туттарыахпыт. Күн дьоно көмүскэс, Айыы киһитэ аһыныгас!»

Үгүс дьон бу суругу масыанньыктар суруйбуттарын курдук ылыннылар. Дугуйдантан сураһа сылдьыбыппар, Дугуйдан маннык хоруйу биэрдэ:

— Ити дьон билигин эрийэ сырыттылар. «Саха сирэ» диэн батсаап-бөлөх дьоно биһиэхэ көмө харчы хомуйа сылдьар эбит. Ыам ыйын 21 күнүгэр аттанаары турдахпытына туттараллар үһү. «Биһиги масыанньыктар буолбатахпыт, эйиигиттэн көҥүл ылаары эрийэбит», — диэтилэр. Ити курдук көмөлөһөр баҕалаах дьон үгүс. Кинилэргэ бука барыларыгар махталбытын тиэрдэбит», — диэн Дугуйдан Винокуров санаатын үллэһиннэ.

Дугуйдан Винокуровы кытта кэпсэтиини «Саха сирэ» хаһыат чэппиэрдээҕи нүөмэригэр ааҕыҥ.

Елена ПОТОЦКАЯ, «Саха сирэ» хаһыат, edersaas.ru

Хаартыскалары Дугуйдан Винокуров тиксэрдэ.

3
0