Бүгүн Орджоникидзе болуоссатыгар ыытыллыбыт «Дьокуускайга тапталбытын билинэбит» диэн улуустар, уопсастыбаннай тэриллиилэр, ыччат тэрилтэлэрин быыстапкатыгар Тымныы полюһа Өймөкөөн улууһа күннээтэ.
Өймөкөөннөр бу күннэргэ Москваттан эргиллибит Дугуйданнарын иннилэригэр былаах оҥостон, киэҥ, дириҥ ис хоһоонноох бырагырааманы бэлэмнээбиттэр.
Ол да иһин буолуо, тэрийээччилэр ох курдук оҥостон кэлбит Өймөкөөн улууһун бэрэстэбиитэллэрин бастакынан сценаҕа таһааран, болуоссакка ыытыллар күнүскү бырааһынньыктааҕы тэрээһини үөрүүлээхтик аһалларыгар чиэһи сүктэрдилэр.
Өймөкөөннөр «Индигиир» ансаамбылларын, Дугуйданнарын инники таһааран, куорат үбүлүөйдээх тэрээһинин астылар. Дугуйданнаах Мичил айаннарын быыстапката дьон болҕомтотун тарта.
Харысхал тигиитигэр уһуйаан иитээччитэ Мария Максимова, «Туой тойуга » оҥоһугу оҥорууга Алена Терентьева маастар кылаастары ыыттылар.
Норуот эмчитэ Виктор Кривошапкины кытта көрсүһүү буолла.
Хоһоонньут Майя Винокурова бэйэтин хоһооннорун аахта. Бу күннэргэ Дугуйдан ийэтэ Ирина Винокурова Майя Арсентьевна «Тапталлаах Өймөкөөнүм» диэн хоһоонун ырыа гынан көтүттэ.
Норуот маастара, Сордоҥноох улууһуттан төрүттээх Татьяна Константинова сиэлинэн үлэтин быыстапката турда.
Хара Тумултан төрүттээх Екатерина Черкашина — Катя ЧКРШ биир дойдулаахтарын былаһааккатын эмиэ киэргэттэ.
Оттон Дугуйдаан дьону кытта хаартыскаҕа түһэриттэн соло булбата. Өрөспүүбүлүкэ араас улуустарыттан бырааһынньыкка кэлбит дьон Дугуйданы кытта бииргэ хаартыскаҕа түһэн, үөрүүлэрэ сүрдэннэ.
Тэрийээччилэр тэрээһин бүтүүтэ Өймөкөөн улууһун былааһаккатын үгүс дьону түмпүтүн, олус тэрээһиннээхтик, түмсүүлээхтик үлэлээбиттэрин махтал суругунан бэлиэтээтилэр.
Бүгүҥҥү үбүлүөйдээх бырааһынньыгы дьон-сэргэ ылынна, тэрээһин табылынна.
Елена ПОТОЦКАЯ, «Саха сирэ» хаһыат.