Дугуйдан түөһүн ханнык мэтээллэр киэргэтэллэрий?

Ааптар: 
Бөлөххө киир:

Бу күннэргэ Нуучча географическай уопсастыбатын үбүлүөйдээх тэрээһинэ Москва куорат аатырбыт Зарядье пааркатыгар буолан ааста.

Манна бочуоттаах ыалдьыт быһыытынан Дугуйдан Винокуров кыттыыны ылла. Өймөкөөн улууһун Үчүгэй нэһилиэгин сылгыһыта соторутааҕыта саха атын туругурдар «Тымныы полюһуттан Москваҕа» диэн атынан айанын түмүктээбитэ.
Дугуйдан Нуучча географическай уопсастыбатын үбүлүөйдээх тэрээһинигэр олорор хаартыскатын көрөн баран, батсаабынан туһанааччылар Өймөкөөн сылгыһытын «икки уордьаннаах олорор дии!» диэн бэлиэтии көрбүттэрэ. Сонно тута куйаар ситимигэр Дугуйданы «РГО уордьанынан наҕараадалаабыт» диэн сурах тилийэ көппүтэ.

«Туох уордьанын ыллыҥ, ханна да официальнай сонуҥҥа суох дии?», — диэн ыйытыыга Дугуйдан маннык хоруй биэрдэ: «Саҥа мэтээл да, уордьан да суох. Ити хаартыскаҕа урукку мэтээллэрбин кэтэ сылдьабын. Москва Коломенскай пааркатыгар буолбут үбүлүөйдээх ыһыахха «Гражданскай килбиэн» бэлиэни үөрүүлээх быһыыга-майгыга туттарбыттара. Оттон иккис мэтээл — Саха АССР 100 сылыгар анаан туттарбыт мэтээллэрэ. Нуучча географическай уопсастыбатыттан Артур Чилингаров Махтал суругун туппутум». Онон Дугуйдан Винокуров батсаапка тарҕаммыт аатырбыт хаартыскатыгар кини түөһүн туох бэлиэлэр киэргэтэллэрин бары дьэ биллэхпит.

Оттон Нуучча географическай уопсастыбата, биллэн турар, Тымныы полюһуттан Москваҕа диэри саха атын айанын кэтии олорон, айан кыттыылаахтарыгар сүҥкэн өйөбүлү оҥордо. Кинилэр атыгар олорор Дугуйдан макетын оҥорон дьон дьүүлүгэр таһаарбыттара эмиэ сонун көстүүнэн буолла. Өйөбүллэригэр махтанан, Өймөкөөн аатырбыт сылгыһыта бэйэтэ айаннаан кэлбит ыҥыырын Нуучча географическай уопсастыбатын мусуойугар бэлэх быһыытынан туттарда. Бэҕэһээ, бүгүн Дугуйдан Винокуров Москваҕа саха атын туһунан икки күннээх лиэксийэлэри аахта. Бу күннэргэ Өймөкөөн аттарын дойдуларыгар төттөрү илдьэр туһунан хаһаайыннара Дугуйдан Винокуров кэпсэтии ыыта сылдьар.

Елена ПОТОЦКАЯ, «Саха сирэ» хаһыат.

+1
0
+1
0
+1
0
+1
0
+1
0
+1
0
+1
0