Бүгүн күнүс Тымныы полюһа Өймөкөөн улууһун сылгыһыта Дугуйдан Винокуров Москва куораттан аттарын Хаастааҕы уонна Хонору кытта Дьокуускайга кэлэн түстүлэр.
Таһаҕас терминалыгар кинини көрсө тиийбит Нуучча географическай уопсастыбатын Өймөкөөн улууһунааҕы салаатын чилиэнэ Розалия Кондакованы кытта кэпсэттим. Розалия Петровна төлөпүөнүнэн тута Дугуйдааҥҥа туһаайбытыгар, кэпсэтэн ыллыбыт.
Мин «дойдугар этэҥҥэ эргиллэн кэлбиккинэн!» диэн эҕэрдэбэр Дугуйдан тута хардарда:
— Махтал! Хаастаах уонна Хонор этэҥҥэ Саха сиригэр үктэннилэр. Билигин Үс Хатыҥҥа тиийэн, аттарбын сынньатыам. Аара айаҥҥа хараҕын дэҥнээбит Сунтаарбытын Мэҥэ Балыктааҕыттан дойдутугар илдьэ барыахпыт. Былаан элбэх. Онтон сыыйа дойдубутугар Өймөкөөннүөхпүт, — диэн Дугуйдан аттарын сөмөлүөттэн таһааран иһэн кэпсэтэн ааста.
Салгыы Розалия Кондакова Дугуйдан былаанын билиһиннэрдэ:
— Дугуйдааны, Хаастааҕы уонна Хонору наһаа элбэх киһи көрсө киирбит. Тыа хаһаайыстыбатын миниистирин солбуйааччы Николай Афанасьев, Нуучча географическай уопсастыбатын Саха сиринээҕи салаатын үлэһиттэрэ, суруналыыстар, аймахтара, биир дойдулаахтара — бары Дугуйданы айхаллыы көрүстүбүт.
Манна Санкт-Петербургтан «Пути великих свершений» киинэни уста сылдьар оператордар эмиэ бааллар. Кинилэр Дугуйданы уонна кини аттарын Өймөкөөҥҥө тиийэ арыаллаан устуохтара уонна Үчүгэй Дьэкэйигэр тиийэн эмиэ документальнай киинэлэрин салгыахтара. Балаҕан ыйын 11 күнүгэр Орджоникидзе болуоссатыгар куорат мэрэ Евгений Григорьев Дугуйдаммытын чиэстээн көрсүөҕэ. Онтон Тыа хаһаайыстыбатын агротехнологическай университетыгар устудьуоннары кытта көрсүһүү буолуоҕа. Дугудайданы кытта көрсүһүүлэр Тыа хаһаайыстыбатын министэристибэтэ ыытар дьаарбаҥкатыгар кинини уонна кини аттарын чиэстээһининэн түмүктэниэҕэ. Ол кэнниттэн Дугуйдан аттарын кытта төрөөбүт Өймөкөөнүгэр айанныаҕа.
Бүгүн Саха сирэ Дугуйдан Винокуровы төрөөбүт дойдутугар этэҥҥэ үктэммитинэн эҕэрдэлии, уруйдуу көрсөр!
Елена ПОТОЦКАЯ, «Саха сирэ» хаһыат.
Хаартыска — Розалия Кондакова тиксэриитэ.