Аан дойдуга алмааһы хостуур “АЛРОСА” бөдөҥ хампаанньа Дубайга 10,8 караттаах күлүмүрдэс күндү таас аукционун тэрийэн ыытан 9,5 мөлүйүөн дуоллары киллэрдэ. Уопсайа, 2140 карааттаах 141 алмаас атыыланна. Аукциоҥҥа Индия, Бельгия, Холбоһуктах Арабскай Эмират, Израиль, Гонконг, Арассыыйа хампаанньалара кытыннылар.
Евгений Агуреев, «АЛРОСА-ЕСО» дириэктэрэ, бырабылыанньа чилиэнэ:
— Дубай — аан дойдуга алмаас атыытын килбэйэр киинэ. Сыл аайы биһиги түөртүү аукцион ыытарбыт тухары дьон интэриэһэ уҕараабат. 2018 сылга манна уопсайа, 40 мөлүйүөн дуолларга бородууксуйабытын батардыбыт.
2014 с. хампаанньа Дубайдааҕы алмаас биржатын кытта бииргэ үлэлэһэргэ, алмаас ырыынагын сайыннарарга меморандум түһэрсибитэ.
Бу соторутааҕыта Үөһээ Муунаҕа көстүбүт бастакы улахан алмааска дойдутун аатын иҥэрэн, “Өлөөннөөҕү” күндү таас диэн сүрэхтээтилэр. Онон Сахабыт сирин хотугулуу арҕаа улууһа, Эбэҥки национальнай оройуона аан дойдуга ааттаныа, суон сураҕа сураҕырыа.
Марианна Тыртыкова, «Саха сирэ», edersaas.ru