Бэрэсидьиэн Владмир Путин ыйааҕынан бу нэдиэлэҕэ уһун өрөбүл биллэрилиннэ.
edersaas.ru.
Олоҕу-дьаһаҕы хааччыйар тэрилтэ үлэһиттэрэ: эмчиттэр, санитарнай быраастар, полиция, ОДьКХ үлэһиттэрэ уонна коронавирус дьаҥа тарҕамматын туһугар сыралаһар дьон үлэтин тохтоппот. Кинилэр оҕолоругар анаан дьуһуурунай уһуйааннар уонна бөлөхтөр тэриллибиттэрин Үөрэх уонна наука министиэристибэтин пресс-сулууспата иһитиннэрэр.
– Сорох дьон уһуйаан барыта тоҕо үлэлээбэтий диэн ыйытар. Бу нэдиэлэ каникулунан биллэриллэн, үгүс төрөппүт дьиэтигэр олорор, онон уһуйааннары толору үлэлэтэргэ наадыйыы суох. Улуустар уонна куораттар дьаһалталара хас миэстэлээх дьуһуурунай уһуйааны үлэлэтэллэрин сайаапка киириитинэн көрөн, бэйэлэрэ быһаараллар, —— диир миниистир Владимир Егоров.
Дьокуускайга «Искорка» уһуйаан дьуһуурунай оҕо саадынан биллэрилиннэ. Бүгүн 24 оҕо икки бөлөҕүнэн сырытта. Наада буолар түбэлтэтигэр төгүрүк суукканан үлэлиир эрэсиимҥэ көһөр боппуруос үөрэтиллэр. Үөһээ Бүлүүгэ 8 №-дээх «Аленушкаҕа» 54 кырачаан сылдьар. Куттал суох буолуутун хааччыйарга сөптөөх дьаһал ылыллыбыт. Ол курдук, бөлөххө киириигэ хас биирдии оҕо температурата бэрэбиэркэлэнэр, төрөппүттэр мааскалаах буолаллара ирдэнэр, киирэр ааҥҥа антисептиктар, биирдэ туттуллар салфеткалар бааллар. «Төрөппүттэри кытары көрсөн кэпсэттим, маннык эппиэттээх кэмҥэ холкутук үлэлиэхпит диэн астыналлар», – диэн этэр улуустааҕы үөрэх управлениетын начальнига Спиридон Борбуев.
Үөрэх уонна наука министиэристибэтэ дьуһуурунай уһуйааннар үлэлэригр күн аайы мониторинг оҥорор. Бүгүн 26 улууска уонна икки куоракка дьуһуурунай уһуйааннар аһылыннылар. Барыта 37 дьуһуурунай уһуйаан, 69 дьуһуурунай бөлөх үлэлиир, олорго 459 иитиллээччи сылдьар. Аҕыс улууска маннык бөлөхтөрү арыйарга наадыйыы билиҥиҥтэ суох.
– Дьуһуурунай уһуйааннары тэрийии бастатан туран биһиги доруобуйабыт көмүскэлигэр сылдьар дьоммут үлэлэрин усулуобуйаларын тэрийии буолар. Бу олус улахан суолталаах үлэни биһиги тэрээһиннээхтик саҕалаатыбыт, — диэн бэлиэтээтэ бырабыыталыстыба бэрэссэдээтэлин солбуйааччы, коронавирус дьаҥын утары охсуһар суһал штаб бэрэссэдээтэлин солбуйааччы Ольга Балабкина.
Раиса Сибирякова, «Саха сирэ» хаһыат, edersaas.ru