“Фактор Z” биэриигэ ДОСААФ тэрилтэ бэрэстэбиитэллэрэ Сергей Прокопьев уонна Анатолий Зайцев ыалдьыттаатылар. ДОСААФ диэн “Добровольное содействие армии, авиации и флоту” диэн тылбаастанар. Манна байыаннай-патриотическай бэлэмнэнии ыытыллар.
Аҕа дойдуну көмүскүүр сэрии иннинэ ДОСААФ офицердары бэлэмнээн таһаарар оскуолалаах этэ.
— Биһиги эһэлэрбит Аҕа дойдуну көмүскүүргэ хорсуннук туруммуттара. Сэрии таарыйбатах ыала диэн суох. Биһиги да билигин сирбитин-уоппутун, идиэйэлэрбитин көмүскүүргэ быар куустан олоруо суохтаахпыт. Онон биһиги эмиэ Анал дьайыыга кыттыһыан баҕалаахтартан “ДОСААФ этэрээтин” бэлэмнээн, Украинаҕа бараары сылдьабыт.
Оскуолаҕа аармыйаҕа бэлэмниир байыаннай бэлэмнэнии суох буолбута атахтыыр. Урут хас оскуола аайы ытар тиир баар буолара. Өрөспүүбүлүкэ сэрии саҕана снайперскай хамсааһыны саҕалаабыта. Олус үчүгэй ытааччылар бааллара. Ол билигин умнулунна. Ытар үөрүйэҕи сайыннарарга тиир баар буолуохтаах. Ол эрээри, патриотическай иитии билигин саҕаланан эрэр.
ДОСААФ онно бэйэтин кылаатын киллэрэр. “Аһаҕас аан күнүгэр” байыаннай тиэхиньикэ быыстапкатын 1,5 тыһыынча киһи сылдьан, көрбүтэ-истибитэ. Оҕолор олус интэриэһиргииллэр. “Рыжиков кулуубугар” сааны хомуйарга, ытарга үөрэтэллэр.
Аныгы сэрии тепловизора, оптикалаах саата, квадрокоптера суох табыллыбат буолла дииллэр. Биһиги квадрокоптеры салайарга үөрэтэргэ бэлэммит. Преподавателлэр бэлэмнэр. Тепловизор дьайыытын эмиэ үөрэппиппит. Онон тепловизортан хайдах саптарга, миинэ, оскуолак тэбиититтэн хайдах көмүскэнэргэ үөрэтиэххэ сөп. Бу барыта байыаннай дьайыыга бэлэмнээх буолууну ирдиир. ДОСААФ базатыгар маннык киин баар буолуон баҕарабыт, — диэн кинилэр кэпсээтилэр.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.