Дьоруойдары өссө биир тургутуу күүтэр

Бөлөххө киир:

 

Ааспыт сыл ахсынньы 19 күнүгэр Булуҥ улууһугар саахалламмыт Ил-18 сөмөлүөт байыаннайдарын быыһаабыт Саха сирин быраастарыгар үрдүк наҕараадалары туттардылар.

Надежда ЕГОРОВА, «Саха сирэ» хаһыат, edersaas.ru

Хорсун быраастар РФ уонна СӨ Доруобуйа харыстабылын министиэристибэтиттэн, Саха сирин Ил Дарханыттан наҕараадалары ыллылар.

Хирурдар Артём Староватов уонна  Гаврил Собакин, нейрохирурдар Игорь Яхонтов уонна Семён Сивцев, травматологтар Сергей Софронов уонна Александр Максимов, анестезиолог-реаниматологтар Очир Дашидамбрылов уонна Дьулустан Данилов, санитарнай авиация фельдшердэрэ Ариан Сивцев уонна Максим Тойтонов курдук идэлэригэр бэриниилээх, дириҥ билиилээх эмчиттэргэ норуот «Заполярье аанньаллара» диэн ааты иҥэрэ охсубута мээнэҕэ буолбатах.

Ону сэргэ, «Заполярье аанньаллара» «Билинии» диэн быраастар Бүтүн Арассыыйатааҕы куонкурустарыгар кыттар чиэскэ тигистилэр.

х х х

Ааспыт сыл ахсынньы 19 күнүгэр Булуҥ улууһугар Ил-18 сөмөлүөт саахалланан, 38 байыаннай сулууспалаах ыарахан эчэйиини ылбыта. Саха сирин эмчиттэрин көмөлөрүнэн, дьолго, бары тыыннаах хаалбыттара. Күн-дьыл усулуобуйата мөлтөөн, буурҕа түһэн, Арассыыйа быыһааччылара кэмигэр кэлэ охсубатахтара. Онон, өскөтүн биһиги эмчиттэрбит сөптөөх көмөнү суһаллык оҥоро охсубатахтара буоллар, туох буолуон саныахха ыарахан.

Реаниматолог, нейрохирург, травматолог-быраастартан уонна фельдшердэртэн турар биригээдэ хомулла охсон, Булуҥ улууһун кытта сэргэ сытар Усуйаана улууһугар сөмөлүөтүнэн көппүтэ. Уонна  Ми-8  бөртөлүөт лүөччүктэрин сатабылларынан   Тиксии пордугар  түспүтэ.

Бириэмэ ааспытын кэннэ түмүктэри оҥордоххо, биһиги быраастарбыт улахан тургутууну ааспыттар уонна Саха сиригэр доруобуйа харыстабылын туругун сыаналыыр кыах бэриллибит эбит. Ыксаллаах кэмҥэ «көмүс» бириэмэни сүтэрбэккэ, сөптөөх көмө оҥоһулларыгар туох  улахан оруолу оонньообутай ?

– Булуҥ улууһун  киин балыыһата аныгы медицинскэй тэриллэринэн хааччыллыылааҕа;

– Улуус киин балыыһатын эмчиттэрэ ыксаллаах кэмҥэ сөптөөх дьаһаллары ылбыттара;

– Өрөспүүбүлүкэтээҕи 2 №-дээх балыыһа Телемедицинаҕа кииннээҕэ;

– Хас да эмтиир тэрилтэ биир санаанан, түмсүүлээхтик, суһаллык үлэлээһиннэрэ;

— Көмөҕө тиийбит биригээдэ эмчиттэрин үрдүк таһымнара, киэҥ билиилэрэ, үлэлэригэр бэриниилээхтэрэ;

— Ыраах сытар нэһилиэнньэлээх пууннарга эмтиир тэрилтэлэри сабар туһунан РФ Ыйааҕа биһиэхэ сөп түбэспэтин дакаастаан, өрөспүүбүлүкэ салалтата хотугу улуустарга балыыһалары оннунан хаалларыыны ситиһиитэ уо.д.а.

ЫСПЫРААПКА:

Быраастар «Билинии» Бүтүн Арассыыйатааҕы куонкурустара 2000 сылтан ыытыллар.

2011 сылтан дойду бастыҥ быраастара норуот билиниитин сэргэ, харчынан бириэмийэни ылаллар.

Үс түһүмэҕинэн ыытыллар куонкурус түмүгүн киин хамыыһыйа быһаарар. 40-ҥа чугаһыыр номинациянан ыытыллар куонкуруска Арассыыйа субъектарын эмчиттэрэ кытталлар.

Надежда ЕГОРОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0