Дьоруой Сүөдэр Попов туһунан «Соҕотох бэс» диэн киинэ уһулунна (Видео)

Бөлөххө киир:

Бэс ыйын 21 күнүгэр “ХОДУЛОВ-KIIN” ютууб-ханаалга Мэҥэ-Хаҥалас улууһугар биллэриллибит Дьоруой сылынан, Саха Ньургун уола, сахаттан бастакы Сэбиэскэй Сойуус Дьоруойа Федор Кузьмич Попов төрөөбүтэ 100 сылынан Майатааҕы Дмитрий Ходулов аатынан норуодунай тыйаатыр уонна Дмитрий Ходулов аатынан Норуот айымньытын дьиэтэ «Ытык иэс» испэктээккэ (Иннокентий Сергучев, Прасковья Адамова) олоҕуран «СОҔОТОХ БЭС» диэн уус-уран киинэни сүрэхтээтэ.

Долгутуулаах сүрэхтээһин Сэбиэскэй Сойуус Дьоруойа Федор Кузьмич Попов төрөөбүтэ 100 сылыгар аналлаах Үрүҥ Тунах Ыһыах чэрчитинэн буолла.

Киинэ режиссерунан Данил Осипов, туруорааччы-операторынан Андрей Егоров үлэлээтилэр.
Сүрүн оруоллары Сыымахтан төрүттээх, Академик Ларионов аатынан оскуолаҕа үлэ уруогун учууталынан үлэлиир Афанасий Бродников, Дмитрий Ходулов аатынан норуот айымньытын дьиэтин араадьыйатын ыыттааччыта Анастасия Петрова толордулар. Ону сэргэ, өр сылларга Ходулов аатынан норуот тыйаатырын чаҕылхай артыыстара Контвар Сыроватскай уонна Маргарита Максимова оонньоотулар.

Киинэ «Майа сэлиэнньэтэ» МТ олохтоох дьаһалтатын өйөбүлүнэн уһулунна.

Надежда Ильина, «Саха сирэ» хаһыат