Арассыыйатааҕы ЫБММ Саха сиринээҕи управлениетыгар ууттан дьону быыһаабыт түөрт оҕону наҕараадалаатылар. РФ Федеральнай Мунньаҕын аграрнай-продовольственнай бэлиитикэҕэ уонна айылҕаны туһаныыга федеральнай Сэбиэтин бэрэссэдээтэлин солбуйааччы Егор Борисов уонна Кылаабынай управление начаалынньыга Павел Гарин эдэр дьоруойдарга РФ Федеральнай Мунньаҕын “За проявленное мужество” мэтээлин уонна өйдөбүнньүк бэлэхтэри туттардылар.
— Олоххо киһи кыаҕынааҕар быһыы-майгы өрө тутуллар араас түгэннэрэ бааллар. Маныаха суһал быһаарыныы, чопчу уонна хорсун буолуу саамай сыаналааҕы – олоҕу быһыыр кыахтаах. Эһиги үтүө быһыыгыт уонна ситиһиилэргит туһунан өссө истиэхпит диэн эрэнэбин, – диэн Павел Гарин оҕолорго туһаайан эттэ.
Быйыл сайын от ыйын 12 күнүгэр 8 саастаах Валентин Мищенко дьиэ кэргэнинээн Горнай улууһугар Кэҥкэмэ өрүскэ сынньаммыт. Бииргэ үөрэнэр доҕорун Андрейы көрсөн, уолаттар ууга оонньообуттар. Валентин доҕоро үрүллэр матараастан ууга ыстаммыт уонна дьаамаҕа түбэһэн тимирэн барбыт. Валентин уолуйбатах, суһаллык быһаарыы ылынан, доҕорун ууттан быыһаан таһаарбыт. Кини хорсун быһыытын уонна быһаарыылаах дьаһалын түмүгэр киһи олоҕо быыһаммыт.
Быйыл сайын от ыйын 13 күнүгэр үс доҕордуу – 14 саастаах Евгений Ефимов, 17 саастаах Станислав Чупанов уонна 16 саастаах Леонид Куличкин Нам улууһун Граф Биэрэгэ сэлиэнньэтигэр Ледорезка диэн өрүс салаатыгар сөтүөлүү барбыттар. Ити күн олус куйаас буолбут, ол эрээри, соһуччу ардах саҕаламмыт, тыал күүһүрбүт. Онтон улахан өрүс долгуна уонна сүүрүгэ күүһүрэн барбыт. Эмискэ биир дьахтар: “Быыһааҥ, кыргыттар тимирэн эрэллэр!” – диэн хаһыыта иһиллибит. Леонид толкуйдуу барбакка ууга ыстаммыт уонна сүүрүк утары тимирэн эрэр дьон диэки харбаабыт. Киниэхэ көмөлөһө Станислав, онтон Евгений быыһыыр курууктаах ууга ыстаммыттар. Уолаттар бары бэркэ харбыыллар, ол эрээри, сүүрүгэ олус күүстээх эбит. Кыргыттарга бэрт эрэйинэн тиийбиттэр. Леонид бастаан биир кыыска тиийбитигэр, кыыс кутталыттан олус күүскэ тутуһан, иккиэн өлө сыспыттар. Хата, бу бириэмэҕэ быыһыыр курууктаах доҕотторо кэлбиттэр. Онон Леонид, Евгений уонна Станислав хорсун, эр санаалаах буолууларын түмүгэр икки киһи олоҕо быыһаммыт.
Арассыыйатааҕы ЫБММ СӨ кылаабынай управлениета.