“Амматтан төрүттээх Моcкваҕа олорор саха эдэр худуоһунньуга Семен Луканси биэс бырааттыы Малгиннары уонна кинилэр ийэлэрин хартыынаҕа түһэрэн үйэтиппит”, — диэн сонун бу күннэргэ Саха сирин тилийэ көттө.
edersaas.ru
Мин соторутааҕыта Семен Лукансилыын кэпсэтиибэр, кини, Улуу кыайыы 75 сылын көрсө тугу бэлэмнии сылдьарын туһунан: “Оттон Феврония Малгина – Дьоруой Ийэ уобараһын үйэтитэргэ кыһаллан, уоттаах сэриигэ уолаттарын атаарбыт, тугунан да толоруллубат ыар сүтүктээх Ийэ барахсан туһунан, киһи уйулҕатын хамсатар үгүс ахтыылары аахтым, матырыйааллары сирийэн үөрэттим. Бу туһунан суруйуохпун баҕарбытым ыраатта…”,-диэбитэ.
Дьэ бу идиэйэтин кини өссө былырыыҥҥыттан саҕалаан үөрэтэн, оҥорон, илиитин араарбакка үлэлээн, уруһуйдаан, айан, быйыл, бу Улуу даатаны көрсө, олоххо киллэрдэ — «Дьоруой Ийэ Феврония Малгина мэтириэтэ» холст, масло. 120х180 см, 2019-2020 үлэтэ бэлэм буолла.
—Аан бастаан манна Москваҕа турара буолуо, күһүн Улуу Кыайыыга аналлаах улахан үбүлүөйдээх быыстапкалар былааннаналлар, — диир Семен.
Онон, бу хартыынаны биһиги дойдубутугар, Саха сиригэр, илэ харахпытынан көрүөхпүт диэн эмиэ бүк эрэнэбит.
Сэрии таарыйбатах ыала, ийэ-аҕа ууһа диэн, биһиги дойдубутугар, суох. Мин санаабар, худуоһунньук бу хартыынатыгар — Ытык Ийэ сэбэрэтигэр, кини уобараһыгар биһиги хас биирдиибит тус бэйэбит киэнин, биһиэхэ хас биирдиибитигэр сыһыаннааҕы булан көрөбүт…
Татьяна МАРКОВА edersaas.ru