Быйыл Сэбиэскэй Сойуус Дьоруойа Алексей Миронов төрөөбүтэ 110 сыла. Кини 1912 с. кулун тутар 29 күнүгэр (эргэ истиилинэн муус устар 11 күнүгэр) Үөһээ Бүлүү улууһун Кэнтигэр төрөөбүтэ.
6 кылааһы бүтэрэр баран, холкуоска суоччутунан, нэһилиэк сэбиэтин сэкирэтээринэн, кэлин Норуот учуоттааһынын Бүлүүтээҕи управлениятын инспекторынан үлэлээбитэ. 1941 с. балаҕан ыйыгар аармыйаҕа ыҥырыллыбыта. Уоттаах сэриигэ 1942 с. олунньутуттан сылдьыбыта.
Алексей Миронов Москуба аннынааҕы киирсии кэмигэр снайпердар хамсааһыннарын тэрийсибитэ. Саха уолана булт араас албаһын сэриигэ туһаммыта, сайыннарбыта, атыттары үөрэппитэ. Холобура, биирдэ кини чуучула оҥорон, окуопаттан быктаран, немецтэр ону ытан, бэйэлэрин ханна баалларын биллэрбиттэрин кэннэ, дьаһайталаан турардаах.
1943 с. бэс ыйын 26 күнүгэр кинини Сэбиэскэй Сойуус Дьоруойугар түһэрбиттэрэ. 247 с. гвардейскай стрелковай пуолка хамандыыра Василенко илии баттааһыннаах наградной лист баар.
“Кулун тутардааҕы Ермолинка дэриэбинэ таһыгар Миронов суолтан 100 миэтэрэлээзх сиргэ тэйиччи саһа сытан, 15 фашиһы уонна икки аты ытан өлөрөн, немец холуоннатын үрүө-тараа оҥордо. Табаарыс Миронов 123 фашиһы өлөрөн турар. Бэйэтэ 13 снайперы бэлэмнээтэ. Кини үөрэппит снайпердара 65 фашиһы анаараа дойдуга ыыппыттар”, — диэн суруллубут.
Мироновы Аҕа дойду сэриитин 1 истиэпэннээх уордьанынан наҕарадаалабыттара.
1943 с. ыам ыйын 1 күнүгэр «За Родину» хаһыакка суруйбуттар: «В Гвардейской семье наших снайперов больше года находится сын якутского народа гвардии сержант Алексей Миронов. Он метким выстрелом убил 129 немцев… Миронов — умный и отважный воин. Подготовил много снайперов, научил их быть самоотверженными бойцами».
1945 с. кулун тутар 28 күнүгэр Алексей Миронов өстөөх буулдьатыттан ыараханнык бааһырбыта. Кулун тутар 30 күнүгэр госпитальга өлбүтэ. Венгрияҕа Немешперештур диэн нэһилиэнньэлээх пуун аттыгар көмүллэ сытар.
СССР Президенин 1990 с. ыам ыйын 5 күнүнээҕи ыйааҕынан гвардия сержана Миронов Алексей Афанасьевичка Сэбиэскэй Сойуус Дьоруойун аатын иҥэрбиттэрэ.
Улуу Кыайыы 60 сылыгар Дьокуускай Новопортовской микрооройуонун биир уулуусата Миронов аатын сүкпүтэ. 2009 с. Бүлүү улууһун үс дьоруойугар Н. А. Кондаковка, А. А. Мироновка, Н. С. Степановка пааматынньык арыллыбыта. Дьоруой аатын Мастаах орто оскуолата сүгэр. Бүлүүгэ уулусса баар.
«Саха сирэ» хаһыат
Матырыйаалы ХИФУ виртуальнай бибилэтиэкэтиттэн туһанныбыт