Доруобуйаны чөлүгэр түһэрии аныгы кыахтарын дьүүллэстилэр

Бөлөххө киир:

Бүгүн Өрөспүүбүлүкэтээҕи 3 №-дээх килиниичэскэй балыыһа “Современные возможности медицинской реабилитации пациентов различного профиля” диэн пресс-кэмпириэнсийэни ыытта.

Кэмпириэнсийэҕэ Татарстан Өрөспүүбүлүкэтин Доруобуйа харыстабылыгар министиэристибэтин мэдиссиинискэй реабилитацияҕа штаты таһынан кылаабынай исписэлииһэ, бэрэпиэссэр, Казаннааҕы судаарыстыбаннай мэдиссиинискэй академия реабилитологияҕа уонна успуорт мэдиссиинэтигэр кафедратын сэбиэдиссэйэ, мэдиссиинискэй наука доктора Резеда Ахметовна Бодрова, Татарстан Өрөспүүбүлүкэтин Доруобуйа харыстабылыгар министиэристибэтин рефлексотерапияҕа кылаабынай исписэлииһэ, Казаннааҕы судаарыстыбаннай мэдиссиинискэй академия реабилитологияҕа уонна успуорт мэдиссиинэтигэр кафедратын доцена, мэдиссиинискэй наука кандидата Гузель Марсовна Каримова, СӨ Доруобуйа харыстабылын министиэристибэтин штаты таһынан кылаабынай гериатр-исписэлииһэ, Өрөспүүбүлүкэтээҕи 3 №-дэээх килиниичэскэй балыыһа кылаабынай бырааһа, мэдиссиинискэй наука доктора Ольга Викторовна Татаринова, Өрөспүүбүлүкэтээҕи 3 №-дэээх килиниичэскэй балыыһа Эмтиир-реабилитациялыыр киинин сэбиэдиссэйэ Наталия Гавриловна Дмитриева, 3 №-дэээх килиниичэскэй балыыһа ньиэрбэ систиэмэтин функцията кэһиллиилээх ыарыһахтары мэдиссиинискэй реабилитациялааһын отделениетын сэбиэдиссэйэ Анна Николаевна Макарова кытыннылар.

Ольга Татаринова:
«Биһиги быйыл 90 сыллаах үбүлүөйбүтүнэн сибээстээн, үлэбит сүрүн хайысхаларын билиһиннэриэхпитин баҕарабыт. Бастакы хайысхабыт -– персонализированнай мэдиссиинэ, иккиһэ -– гериатрия, аҕам саастаах дьоҥҥо көмөнү оҥоруу, үсүһэ -– мэдиссиинискэй реабилитация.
Бэлиэтээн эттэххэ, мэдиссиинискэй реабилитация уустук наука. Холобур, ковид кэнниттэн бары доруобуйабытын чөлүгэр түһэриэхтээхпитин билэбит. Гериатр идэтинэн дьарыктаныы чэпчэкитэ суох. Саҥа технологиялары билиэххэ наада, саҥа идэлэр баар буоллулар, мэдиссиинискэй тэриллэринэн сэбилэниигэ, каадырдары сүүмэрдээһиҥҥэ, үлэлиир дьиэлэргэ уо.д.а. ирдэбиллэр олохтоннулар. Биһиги доруобуйаны чөлүгэр түһэрии диэн тугун, ирдэбиллэрин уонна инники сайдыытын нэһилиэнньэҕэ төһө кыалларынан элбэхтик кэпсиэхпит», -– диэн бүгүҥҥү научнай-бырактыычаскай кэмпириэнсийэҕэ дьүүллэһиллэр боппуруостары таарыйда.
Өрөспүүбүлүкэтээҕи 3 №-дээх килиниичэскэй балыыһа састаабыгар киирэр эмтиир тэрилтэ РФ араас эрэгийиэнин исписэлиистэрин кытары мэдиссиинискэй реабилитацияҕа бииргэ үлэлиир. Ол курдук, 2022 сылтан Казаннааҕы судаарыстыбаннай мэдиссиинискэй академия реабилатологияҕа уонна успуорт мэдиссиинэтигэр кафедратын сэбиэдиссэйэ Резеда Ахмедовна Бодрова научнай-методическай өттүнэн салайар.

Бүгүҥҥү ыалдьыт Резеда Ахметовна Бодрова  Саха сиригэр Татарстан күннэрин кэмигэр кэлиилэрэ мээнэҕэ буолбатҕын тоһоҕолоон бэлиэтээтэ.
«Биһиги каадырдары бэлэмнииргэ икки сыллаах бииргэ үлэлээбит уопуттаахпыт. 2022 сыллаахха мэдиссиинискэй реабилитацияҕа  барыбытыгар  табыгастаах бырайыак олоххо киирбитэ. РФ бары кэриэтэ субъектарыгар бырагыраамалар ылыллыбыттара, бу бигэргэммит бырагыраамалар 2030 сылга диэри суоттаналлар. Онон чугастааҕы үс сылга мэдиссиинискэй реабилитация сайдыыта уонна систиэмэтэ РФ эрэгийиэннэригэр барыларыгар мэдиссиинискэй көмөнү оҥоруу тустаах ирдэбиллэринэр сөп түбэһиэхтээхтэр», -– диэн кэлбит соруктарын билиһиннэрдэ
Татарстан ыалдьыттара, мэдиссиинискэй реабилитация сүрүннүүр исписэлиистэрэ бэҕэһээ Дьокуускайга ыарыыны сэрэтэр 6 отделение үлэтин-хамнаһын, тиэхиньикэнэн сэбилэниитин, каадырдары билистилэр.
Резеда Ахметовна мэдиссиинискэй реабилитацияҕа СӨ Доруобуйа харыстабылын, Үлэ уонна социальнай сайдыы министиэристибэлэрэ, социальнай страховка пуондата хардарыта бииргэ үлэлиэхтээхтэрин санатта.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0