Быйылгыттан М.К.Аммосов аатынан ХИФУ базатыгар «Физическэй уонна реабилитационнай мэдиссиинэ» диэн саҥа идэҕэ бастакы анал аккредитацияны ыытыы былааннанар.
edersaas.ru
Бу туһунан Өрөспүүбүлүкэтээҕи 3 нүөмэрдээх килиниичэскэй балыыһа Эмтиир-реабилитациялыыр киинин базатыгар ыытыллыбыт мэдиссиинэ реабилитациялыыр исписэлиистэрин өрөспүүбүлүкэтээҕи уопсастыбатын үһүс мунньаҕар этилиннэ.
Гериатрияҕа, реабилатацияҕа уонна персонализированнай мэдиссиинэҕэ анаан үлэлиир өрөспүүбүлүкэ кырдьаҕас балыыһаларыттан биирдэстэрэ быйыл тэриллибитэ 90 сылын бэлиэтиир.
Реабилитация (доруобуйаны чөлүгэр түһэрии) мэдиссиинэ тэтимнээхтик сайдар хайысхата буоларын бэлиэтиир суолталаах. Бу хайысхаҕа РФ бэрэсидьиэнэ В.В.Путин сорудаҕынан Арассыыйаҕа ураты болҕомто ууруллар.
Эмтиир-реабилитациялыыр киин, ол эбэтэр норуот «Якутзолото балыыһата» диэн уруккулуу ааттыыр балыыһата ХИФУ мэдиссиинэ институтун устудьуоннара үөрэнэллэригэр уонна адаптивнай физкультураҕа исписэлиистэри бэлэмнииргэ килиниичэскэй базанан буолар. Өрөспүүбүлүкэтээҕи 3 №-дээх килиниичэскэй балыыһа састаабыгар киирэр эмтиир тэрилтэ РФ араас эрэгийиэнин исписэлиистэрин кытары мэдиссиинискэй реабилитацияҕа бииргэ үлэлиир. Ол курдук, 2022 сылтан Казаннааҕы судаарыстыбаннай мэдиссиинискэй академия реабилатологияҕа уонна успуорт мэдиссиинэтигэр кафедратын сэбиэдиссэйэ Резеда Ахмедовна Бодрова научнай-методическай өттүнэн салайар.
Быһааран эттэххэ, Эмтиир-реабилатациялыыр киин исписэлиистэрэ үс сүрүн хайысханан үлэлииллэр. Бастатан туран, инфаркт миокарда, мэйиигэ хаан эргиирэ күүскэ кэһиллиитин, коронавирус инфекциятын кэнниттэн уонна соматическай ыарыылаахтар доруобуйаларын чөлүгэр түһэрии.
«Доруобуйаны мэдиссиинискэй чөлүгэр түһэриигэ биһиги 2011 сылтан үлэлиибит, эмтэнээччилэр доруобуйаларын чөлүгэр түһэрэргэ улахан килиниичэскэй, методическай уопуттаахпыт», -– диэн сэбиэдиссэй Наталья Дмитриева бэлиэтиир.
Балыыһа РФ сүрүннүүр кииннэригэр анаан үөрэммит уонна аккредитацияламмыт мэдиссиинискэй үлэһиттэринэн хааччыллыылаах. Мэдиссиинскэй наука доктора, кылаабынай быраас Ольга Татаринова салайааччылаах балыыһа салалтата бэйэтин үлэһиттэрэ өрөспүүбүлүкэтээҕи уонна федеральнай тэрилтэлэргэ идэлэрин тиһигин быспакка үрдэтэллэригэр улахан болҕомтотун уурар. Ону таһынан Эмтиир-реабилитациялыыр киин тугунан да сыаналаммат бырактыычаскай уопуттаах быраастара араас тиэмэҕэ биир идэлээхтэригэр методическай ыйыыны-кэрдиини оҥороллор. Ол иһигэр, инсульт, инфаркт миокарда кэнниттэн, сүрэххэ суһаллык эмтэммит дьон доруобуйаларын чөлүгэр түһэриигэ. Эмтиир-реабилатациялыыр киин үлэһиттэрэ кэнники сылларга эмтэнээччилэргэ уонна кинилэр аймахтарыгар бырактыычаскай сүбэлэри, ыйыылары-кэрдиилэри биэрэллэр. Ол сүрүннээн эмтэниигэ, эмтэнээччини көрүүгэ-истиигэ, дьиэҕэ салҕыы реабилатациялааһыҥҥа сыһыаннаах.
Ону таһынан Өрөспүүбүлүкэтээҕи 3 нүөмэрдээх килиниичэскэй балыыһа хас да сыл устата поликлиника базатыгар амбулаторнай реабилитация отделениетын үлэлэтэр. Манна ковид, араас эчэйии уо.д.а. ыарыы кэнниттэн доруобуйаларын чөлүгэр түһэрэргэ амбулаторияҕа кэлэллэр.
Физическэй реабилитационнай мэдиссиинэ бырааһа Владимир Никаноров эппитинэн, Эмтиир-реабилитациялыыр киин тэрийбит мунньаҕар Мэдиссиинискэй реабилитация уонна успуорт мэдиссиинэтин киинэ, Мэдиссиинэ национальнай киинэ, куорат 2 №-дээх балыыһата уо.д.а. курдук Дьокуускай куорат мэдиссиинискэй тэрилтэлэрэ уонна Мииринэй, Амма, Өлүөхүмэ, Сунтаар оройуоннааҕы киин балыыһаларын, чааһынай килииникэлэр уонна санаторийдар үлэһиттэрэ онлайн көрүҥүнэн кытыннылар.
ЫСПЫРААПКА:
«Мэдиссиинискэй реабилитация исписэлиистэрин өрөспүүбүлүкэтээҕи уопсастыбалара» уопсастыбаннай тэрилтэни 2022 сыл тохсунньутугар Өрөспүүбүлүкэтээҕи 3 №-дээх килиниичэскэй балыыһа Эмтиир-реабилитациялыыр киинин исписэлиистэрэ мэдиссиинискэй реабилитацияҕа кыттар араас таһымнаах исписэлиистэри ситимниир, тэрээһин-методическай көмөтүн оҥорор туһугар тэрийбиттэрэ. Уопсастыба чилиэннэринэн саҥа идэ -– физическэй уонна реабилитационнай мэдиссиинэ быраастара, ону таһынан мэдиссиинискэй логопедтар, психологтар, социальнай үлэһиттэр, эрготерапевтар, «узкай» идэлээх быраастар курдук исписэлиистэр буолаллар.
«Саха сирэ», edersaas.ru саайтка анаан Яна БАЙГОЖАЕВА