Уопсастыба

Доруобуйаларынан хааччахтаах дьон айар күрэскэ — куйаар нөҥүө

Доруобуйаларынан хаччахтаах дьоҥҥо үөрэхтээһин уонна доруобуйаларын бөҕөргөтөр өрөспүүбүлүкэтээҕи тиэхиньикум-интэринээт исписэлиистэрэ «Хоту дойду дьонун талааннара»  өрүспүүбүлүкэтээҕи куонкуруһу куйаар нөҥүө тэрийэн ыытта.

edersaas.ru

Куонкурус Аҕа дойду Улуу сэриитин 75, Ийэ дойдуга бэриниилээх буолуу уонна РФ профессиональнай-техническэй үөрэхтээһин 80 сылларыгар ананна.Тэрээһини СӨ Yлэ уонна социальнай сайдыы министиэристибэтэ, СӨ Култуура уонна духуобунас министиэристибэтэ уонна СӨ профессиональнай үөрэхтээһини сайыннарыы института өйөөтүлэр.

Бырайыак ааптара — эдэр талааннаах исписэлиис, парикмахер маастар Сардаана Павлова. Тэрээһин сүрүн соругунан  айар эйгэҕэ доруобуйаларынан хааччахтаах дьон талааннарын, айар дьоҕурдарын, ураты көрүүлэрин арыйыы, кинилэри өйөөһүн уонна көҕүлээһин буолла.

Куонкуруска 7 сааһыттан саҕалаан 72 ытык саастаах дьон, уопсайа 200-чэкэ киһи өрөспүүбүлүкэ 25 муниципальнай оройуонуттан, ол иһигэр Уһук хоту оройуоннартан 7 киһи кыттыыны ыллылар.

 

Уопсайа 153 үлэ уонна нүөмэр туспа толорооччулартан, айар бөлөхтөртөн 8 хайысханан: ырыа, жестовай ырыа, үҥкүү, уус-уран тыл, уруһуй, уус-уран оҥоһук, парикмахер ускуустубата уонна ураты нүөмэр киирбитэ бэлиэтэннэ.

Саамай элбэх кыттааччы — Дьокуускай, Мииринэй куораттарыттан, Үөһээ Бүлүү, Мэҥэ Хаҥалас, Ньурба улуустарыттан бэлиэтэннэ.

Куонкурус үс түһүмэҕинэн тиэхиньикум инстаграмыгар ыытыллан, үгүс киһи интэриэһиргээн көрдө.

Кыттааччылар айар дьоҕурдарын, талааннарын 8 хайысханан үрдүк таһымнаах хамыыһыйалар сыаналаатылар. Ол курдук, РФ үтүөлээх, СӨ норуодунай артыыһа, Арассыыйа ускуустубатын сойууһун чилиэнэ Афанасий Афанасьев, РФ үтүөлээх артыыһа, СӨ ыччат бэлиитикэтин туйгуна, СӨ култууратын туйгуна Дарья Лаврова,   СӨ үтүөлээх артыыһа Ростислав Лебедев,  СӨ култууратын үтүөлээх үлэһитэ, РФ худуоһунньуктарын сойууһун чилиэнэ Дария Дмитриева, СӨ култуура уонна духуобунас министиэристибэтин сүрүн исписэлииһэ Наталья Сергеева,  Дьокуускайдааҕы П.П.Романов аатынан художественнай училище (кэллиэс) учуутала Надежда Корнилова,  СӨ профессиональнай үөрэхтээһин туйгуна Римма Дмитриева,  жестовай ырыа «Ыллыыр сүрэхтэр» куруһуок салайааччыта, өрөспүүбүлүкэтээҕи коррекционнай оскуола-интэринээт учуутала Наталья Герасимова ирдэбиллээхтик сыаналаатылар.

Тиэхиньикум дириэктэрэ, куонкуруһу тэрийэр хамыһыйа бэрэссэдээтэлэ Рина Винокурова:

Үрдүк таһымнаах тэрээһин буолан ааста. Доруобуйатынан хааччахтаах элбэх оҕо, ыччат, саастаах көлүөнэ дьон кыттыыны ыллылар. Онон  нэһилиэнньэ бары араҥата хабыллан, улахан интэриэс үөскээтэ. Сахабыт сирин араас муннуктарыттан кыттан, хоту дойдубут уһулуччу талааннаах дьонуттан сөҕүөххэ уонна киэҥ туттуохха сөп, — диэн бэлиэтээтэ.

Тиэхиньикум кэлэктиибин үлэһиттэрэ бу улахан тэрээһини ыытарга кыһамньылара, болҕомтолоро, өйөбүллэрэ  хас биирдии куонкурус кыттааччытын санаатын көтөхтө.  Тэрээһин биһиги эрэллээх, биир санаанан үлэлэһэр доҕотторбут, убаастабыллаах социальнай партнердарбыт көмөлөрүнэн, улахан өйөбүллэринэн сыалын- соругун 100 бырыһыан толордо.

Ис сүрэхпититтэн истиҥ махталбытын тэрийээччилэр ааттарыттан дьүүллүүр хамыыһыйалар бары бэрэссэдээтэллэригэр, спонсардарбытыгар тиэрдэбит. Кинилэри киэн тутта ааттыыбыт:   «СЭТТЭ» ХЭУо (ген.дириэктэр Яковлев Ф.Д.), «ЯХОНТ» киин (дир. Атакова В.С.),  «МГК» ХЭУо (дир. Грайфер С.В.), «Zima» түүлээх таҥас ательета (сал. Саввинова А.А.),  «Венимс»  ХЭУо (дир. Васильев Н.Д.), «Оберон» ХЭУо (дир. Атласов С.П.), урбааньыттар: ИП «Птицын П.П», ИП «Ануфриев В.Г.», ИП «Михайлова М.Н.»,   ИП «Поляков А.В.», ИП «Петров В.П.», Захаровтар, Абрамовтар дьиэ кэргэттэригэр, А.Афанасьевка, «Тэтим» араадьыйа, «Саха» НКИХ уо.д.а. тэрилтэлэргэ, үтүөкэн сүрэхтээх сырдыгы эрэ түстүүр дьоммутугар-сэргэбитигэр барҕа махтал буолуохтун! Баҕарабыт барыгытыгар чэгиэн доруобуйаны, үлэҕитигэр-хамнаскытыгар үрдүктэн-үрдүк ситиһиилэри, өрө дабайыыны, эрэллээх партнердары, дьиэ кэргэттэргитигэр байылыат олоҕу, өйөбүлү, этэҥҥэ буолууну, дьоллоох-соргулаах олоҕу!

Ийэ дойдуга бэриниилээх буолуу сылыгар, биһиги сомоҕолоһуубут өссө төгүл бигэргэттэ – бииргэ буоллахха элбэҕи кыайыахха сөбүн!

«Саха сирэ» хаһыат, edersaas.ru анаан Ирина ЗАХАРОВА,

тиэхиньикум отделын салайааччыта.

 

 

 

0
0
Telegram @edersaas20

Добавить комментарий