Арассыыйа президенэ Владимир Путин 2018 сылы Үтүө дьулуур сылынан биллэрбитэ. Муус устар 7 күнүгэр Саха Өрөспүүбүлүкэтигэр «Табыгастаах эйгэ» («Доступный мир») аһымал аахсыйа ыытыллыаҕа.
edersaas.ru
Устудьуоннар уонна исписэлиистэр – инбэлииттэр өрөспүүбүлүкэтээҕи ассоциацияларын бырабылыанньатын бэрэссэдээтэлэ, инклюзивнай үөрэхтээһини сайыннарыыга Хотугулуу-Илиҥҥи научнай-инновационнай киин дириэктэрэ Пантелеймон Егоров иһитиннэрбитинэн, маннык аахсыйа университекка номнуо төрдүс сылын ыытыллар. Манна 16-тан үөһээ саастаах 50-60-ча баҕалаах киһи кыттар. Кинилэр тустаах «оруолларга киирээри»: үөрэх уонна үлэ кэмигэр икки чаас устата кулгаахтарын бүөлэниэхтэрэ уонна харахтарын саптыахтара; куорат устун уонна тустаах тэрилтэлэргэ кэлээскэлээх сылдьыахтара. Аахсыйа кэнниттэн эттэринэн-хааннарынан, өйдөрүнэн-санааларынан тугу билбиттэрин, доруобуйаларыгар хааччахтаах дьон кыһалҕаларын хайдах ылыммыттарын үллэстиэхтэрэ.
Ол эбэтэр, кыттааччылар бу аахсыйаны ыытан киһиэхэ саамай күндү доруобуйа буоларын, бу сыаннаһы оҕо эрдэхтэн харыстаныллыахтааҕын өйдөтөр соруктаахтар.
Ону сэргэ, аахсыйа соругунан доруобуйаларын туругунан олох араас ыарахаттарыгар түбэспит дьон кыһалҕаларыгар уопсастыба болҕомтотун тардыы буолар. Маннык тэрээһиннэр кэннилэриттэн социальнай суолталаах бырайыактары олоххо киллэрэргэ көмөлөһөр волонтердар этэрээттэрэ тэриллиэхтэрэ.
Надежда ЕГОРОВА, «Саха сирэ» хаһыат, edersaas.ru