Ахсынньы 30 күнүгэр Ил Дархан Айсен Николаев тэлэбиидэнньэ быһа эпииригэр сыл түмүктэрин таһаарда, үүнэр сылга үлэни-хамнаһы торумнаата.
— Айсен Сергеевич, үүнэр 2021 сылы Доруобуйа сылынан туох сыалтан биллэрдиҥ?
— Бу үүнэр сылы өрөспүүбүлүкэҕэ үөскээбит балаһыанньаны ырытан көрөн баран, Доруобуйа сылынан биллэрбитим. Доруобуйабыт хайдах курдук улахан, тыын суолталааҕын уонна кэбирэҕин өйдөөтүбүт. Былаас уонна уопсастыба, хас биирдии киһи эт-хаан, өй-санаа өттүнэн доруобуйата чөл буоларыгар кыһаныахтаах. Ол онтон доруобай уопсастыба үөскүүр. 2021 сылга, биллэн турар, доруобуйа харыстабылыгар улахан болҕомто ууруллуоҕа. Пандемия доруобуйа харыстабылын систиэмэтин күүстээх өрүттэрин сэргэ, уустук кыһалҕалары булан көрдөрдө.
Мин санаабар, мэдиссиинэ киһиэхэ, кини кыһалҕаларыгар туһуламмыт буолуохтаах. Киирбит үҥсүүлэри, систиэмэ кыһалҕаларын ырытан көрөн баран, киһи чопчу кыһалҕатыгар болҕомто тиийбэтиттэн үөскүүр эбит диэн түмүккэ кэллибит. Үүммүт сылга бу кыһалҕа туоратылларыгар, уларыйыылар тахсалларыгар эрэллээхпин.
Миэдиктэр хамнастарын үрдэтии, мэдиссиинэ тэрилтэлэрин анал тиэхиньикэнэн, аныгы дьиэнэн-уотунан хааччыйыы салҕаныаҕа, 2021 сылга 5 улуус киинигэр киин балыыһалар дьиэлэрэ тутуллуохтара. Дойду үрдүнэн биир бастыҥ кардиологическай киин, онкологическай киин тутуллан киириэхтэрэ. Инфекционнай балыыһа дьиэтин тутуу саҕаланыаҕа.
Ол эрээри, мэдиссиинэҕэ эрэ сэлээннэнэн баран сылдьар табыллыбат. Доруобуйа сылыгар эппиэтинэстээхтик сыһыаннаһан, арыгыттан, табахтан аккаастанан, чэгиэн буоларга тардыһан, чөл олоҕу тутуһуохха наада. Спордунан, физкултууранан дьарыктанарга спортиынай саалалары, былаһааккалары үлэлэтии ирдэнэр. Тыйыс усулуобуйаҕа чэгиэн буоларга наука уонна мэдиссиинэ бииргэ кыттыһан үлэлиэхтээхтэр.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru