Доруобуйа харыстабылын министиэристибэтин дэлэгээссийэтэ Сунтаарга үлэлээтэ
СӨ Доруобуйаҕа харыстабылын министиэристибэтин дэлэгээссийэтэ Сунтаар улууһугар сырытта.
edersaas.ru
Дэлэгээссийэ састаабыгар СӨ доруобуйа харыстабылын миниистирин солбуйааччы Любовь Бурнашева, министиэристибэ штаты таһынан кылаабынай кардиолога Елена Кылбанова, онколог-хирург, онкология өрөспүүбүлүкэтээҕи диспансерын кылаабынай бырааһын солбуйааччы Петр Никифоров, Мэдиссиинэ национальнай киинин невролог-бырааһа Нина Васильева үлэлээтилэр.
Сунтаар оройуоннааҕы киин балыыһатын кылаабынай бырааһын эмтээһин үлэтигэр солбуйааччы Константин Павлов оробуочай сырыы кэмигэр оройуон балыыһатын подразделениеларын, мэдиссиинискэй көмөнү тэрийиини билиһиннэрдэ. Дэлэгээссийэ дьоно балыыһа сытар отделениетын эмтэнээччилэрин кытары сэһэргэстилэр.
Миниистири солбуйааччы Любовь Бурнашева балыыһа салалтатын кытары көрсүһүүгэ методическай көмөнү оҥордо, ыарахан ыарыһахтары эмтииргэ көмө оҥоһулунна, ыарыыттан өлүүнү аҕыйатыы боппуруостарыгар сэминээр ыытылынна,
Чугастааҕы сылларга балыыһа сайдар кэскилин, балыыһаны мэдиссиинискэй тэриллэринэн салҕыы сайыннарыы болҕомтоҕо ылылынна.
Куораттан кэлбит дэлэгээссийэни Сунтаар улууһун баһылыга Анатолий Григорьев көрүстэ. Дьыалабыай көрсүһүү кэмигэр балыыһа комплексын иккис уочаратын тутуу, эминэн уонна каадырынан хааччыллыы боппуруостарын дьүүллэстилэр.
Любовь Бурнашева улуус баһылыга Анатолий Григорьевка бииргэ үлэлээһин, улуус доруобуйатын харыстабылыгар көмөтүн уонна өйөбүлүн иһин махтанна.
Надежда ЕГОРОВА, «Саха сирэ» хаһыат, edersaas.ru
СӨ Доруобуйа харыстабылын министиэристибэтин хаартыскалара