Доруобуйа харыстабылын миниистирин солбуйааччыга холуобунай дьыала тэрилиннэ (ВИДЕО)
Бэҕэһээ, муус устар 4 күнүгэр, СӨ Доруобуйа харыстабылын миниистирин солбуйааччы Людмила Вербицкая дьиэтигэр уонна үлэлиир кабинетыгар быраабы араҥаччылыыр уорганнар дьэҥдьиир оҥорбуттара. Итинник дьэҥдьиир доруобуйа харыстабылын өрөспүүбүлүкэтээҕи тэрилтэлэригэр эмиэ ыытыллыбыттара.
Онтон киэһэ хойут биллибитинэн, Вербицкаяҕа холуобунай дьыала тэриллибит. Ол туһунан РФ ИДьМ-тын официальнай бэрэстэбиитэлэ Ирина Волк иһитиннэрии оҥорбута (видеону көр).
«СӨ ИДьМ-тын Экономическай буруйдары уонна хоруупсуйаны утары охсуһар управлениетын сотрудниктара борокуратуура уорганнара, Росгвардия уонна Доруобуйа харыстабылын министиэристибэтин салалтата кыттыылаах бэрэбиэркэ ыытан, бу министиэристибэ солбуйааччытын дьайыыларыгар дуоһунас боломуочуйатын аһара барыы баарын быһаардылар», — диэн иһитиннэрдэ Волк.
Бэрэбиэркэ түмүгүнэн, Дьокуускай куорат полициятын Силиэстийэлиир управлениета РФ Холуобунай кодексатын 286-с ыст. 1 чааһынан холуобунай дьыала тэрийдэ.
Барыллааһын силиэстийэ быһаарбытынан, уорбаланааччы, ол эбэтэр, Вербицкая «О контрактной системе в сфере закупок товаров, работ, услуг для обеспечения государственных и муниципальных нужд“ диэн федеральнай сокуону соруйан кэспит.
Ол курдук, пациеннар аһылыктарын тэрийиигэ туттуллар ланч-бокс партиятын Өрөспүүбүлүкэтээҕи балыыһа интэриэһигэр атыылаһыыга конкурснай документацияны бэлэмнээһиҥҥэ кини сулууспатын балаһыанньатынан туһанан, куонкурус кыттыылаахтарыттан биирдэстэригэр барыстаах буоларын курдук уларытыылары киллэрэри ситиспит.
Итинэн кини медицинскэй тэрилтэҕэ бородууктаны таһааччы-аҕалааччы кимин быһаарыыга конкуреннаһар ньыманы кэспит.
Уорбаланааччыга силиэстийэ кэмигэр хаарчахтыыр миэрэ быһыытынан, ханна да барбат баппыыска туттулунна.
Биһиги корр., «Саха сирэ» хаһыат, edersaas.ru
Хаартыска интэриниэттэн, видео РФ ИДьМ-та.