Доруобуйа харыстабылын миниистирэ ыалдьыбыт киһиэхэ эми тиэрдии тоҕо бытаарбытын быһаарда
СӨ Доруобуйа харыстабылын миниистирэ коронавирустаабыт дьоҥҥо босхо эми тиэрдии тоҕо бытаарбытын быһаарда.
Кэнники икки хонукка дьон-сэргэ мэдиссиинэ үлэһиттэрэ коронавирустан эми кэмигэр аҕалбаттарын туһунан үҥсэргиирэ элбээтэ. Манна СӨ Доруобуйа харыстабылын миниистирэ Лена Афанасьева быһаарыы биэрдэ.
Ол курдук, босхо эмтэр «коронавирустаабыт» диэн диагноз бигэргэтиллибит киһитигэр ананан бэриллэллэр.
«Ыалдьыбыта бигэргэтилиннэҕинэ поликлиникалар эми ыарыһахха дьиэтигэр тиэрдиини тэрийэллэр. Коронавирустааччы ахсаана эмискэ элбээбитинэн, өрөспүүбүлүкэ поликлиникаларыгар эмкэ-томко мониторинг оҥоһуллар, эминэн-томунан хааччыллыы кыраапык быһыытынан тиһиктээхтик ыытыллар. Наада буолар эмп саппааһа баар«, — диир миниистир.
Маны сэргэ, коронавируһу тарҕаппат туһуттан, ыалдьыбыт киһи эмин-томун ылаары поликлиникаҕа тиийэрэ наадата суоҕун, анаммыт эми полклиникалар бэйэлэрэ ыалдьыбыт киһиэхэ дьиэтигэр тиэрдэн биэрэллэрин бэлиэтээтэ. Маныаха Дьокуускайга эрэ буолбакка, өрөспүүбүлүкэ бары улуустарыгар мэдиссиинэ үлэһиттэрэ эми тиэрдэн биэрэллэрэ ыйыллар.
Диагноз туруоруллубутун кэнниттэн эми тиэрдиигэ бытаарыы, тардыллыы чахчы тахсыбыта эмтэниигэ наадыйааччы элбээбитин кытары сибээстээх.
Диагноһа чопчу туруоруллубутун кэнниттэн ыалдьыбыт киһиэхэ босхо эми суукка устатыгар тиэрдибэт буоллахтарына, Дьокуускайга 122 нүөмэргэ, өрөспүүбүлүкэ улуустарыгар оройуон киин балыыһаларын быһа нүөмэригэр, ону сэргэ, Контакт центр ОМС РС (Я) 8-800-100-14-03 нүөмэргэ эрийэҕит.
СӨ Ил Дархан уонна Бырабыытаплыстыба пресс-сулууспата
+1
+1
+1
+1
+1
+1
+1