Доруобуйа харыстабылын миниистирэ Елена Борисова быһыыны көхтөөхтүк ыларга ыҥырда

Бүгүҥҥү брифиҥҥэ доруобуйа харыстабылын миниистирэ Елена Борисова, ааспыт сууккаҕа сыстыганнаах дьаҥҥа 100 киһи эбии сутуллубутун бигэргэттэ. Киин куоракка – 61 киһи.

Мэҥэ Хаҥалас, Хаҥалас улуустарыгар — 8-тыы киһи, Уус Алдан – 5, Үөһээ Бүлүү – 4, Алдан, Амма, Ленскэй, Нерюнгри улуустарыгар — 3-түү, Дьааҥы, Мииринэй, Нам, Усуйаана улуустарыгар — 1-дии киһи ыалдьыбыт.

Өрөспүүбүлүкэҕэ сыстыганнаах дьаҥы утары быһыыны биэрии  салгыы ыытыллар.
Бэс ыйын 9 күнүнээҕи туругунан, өрөспүүбүлүкэҕэ 202 409 вакцина дозата кэллэ. Бастакы
быһыыны 180 837 киһи, ол иһигэр 40 682 60 сааһыттан үөһээ киһи ылла. Иккис быһыыны 125 656 киһи, ол иһигэр — 31 250 киһи 60 сааһыттан үөһээ. Өрөспүүбүлүкэҕэ кэлбит вакцина уопсай кээмэйиттэн 88,8% -на туттулунна.
Елена Борисова өрөспүүбүлүкэ олохтоохторун сыстыганнаах дьаҥтан быһыыны көхтөөхтүк ылалларыгар ыҥыран туран, вакцина бары медицинскэй тэрилтэлэргэ, вакцинация тустаах пууннарыгар баарын иһитиннэрдэ. Маны таһынан тэрилтэлэргэ сайаапканан эмиэ ыҥырыахха сөп. Миниистир өрөспүүбүлүкэбэ биллэриллибит бары хааччахтыыр миэрэлэри тутуһарга ыҥырда.

Елена ПОТОЦКАЯ Саха сирэ хаһыат, edersaas.ru