Доруобуйа харыстабылын миниистирэ Амма улууһун олохтоохторун кытары куйаар ситиминэн кэпсэттэ
СӨ Доруобуйа харыстабылын миниистирэ Елена Борисова, от ыйын 7 күнүгэр, Амма улууһун олохтоохторун ыйытыыларыгар куйаар ситиминэн хоруйдары биэрдэ. Кэпсэтии коронавирус дьаҥын утары вакцинация туһунан буолла.
Амма улууһун киин балыыһатын кылаабынай бырааһа Михаил Архипов иһитиннэрбитинэн, билиҥҥи туругунан улууска 36 киһи коронавирустан эмтэнэр. Итинтэн алтата стационарга, амбулаторнайынан — отут.
Кэнники күннэргэ «Эпивак» вакцина 1000 дуозатын туппуттар. Оттон быһыыны биэрии саҕаланыаҕыттан бастакыларын 2940 киһи, иккистэрин 2303 киһи ылбыт. 80% кэриҥэ киһи «Спутник V» вакцинаны ылбыт.
40 мүнүүтэ иһигэр Елена Афраимовна миэстэтигэр суһал ыстааптары салайар нэһилиэктэр баһылыктарыттан, уопсастыбанньыктартан, оройуон дьаһалтатын үлэһиттэриттэн, улуус олохтоохторуттан киирбит отучча ыйытыыга хоруйдаата.
Ордук вакцина сөп түбэһэрин, түбэспэтин, көрдөрүүтүн туһунан ыйыттылар. Саха сирин элбэх олохтооҕо быһыыны ылабын дуу, суох дуу диэн мунар-тэнэр. Маны таһынан, искэн ыарыылаахтарга, диабеттаахтарга, оҕо эмтэрэр уонна хат дьахталларга сыһыаннаах ыйытыылар эмиэ бэрилиннилэр.
Доруобуйа харыстабылын миниистирэ толору уонна чопчу хоруйдары биэрбититтэн аммалар улаханнык астынан махталларын биллэрэллэр. Итиэннэ бу үөрүйэх маннык салҕанарыгар эрэнэллэр. Биир хонук устатыгар видеонан устууну 2000 киһи көрбүт.
+1
+1
+1
+1
+1
+1
+1