СӨ Доруобуйа харыстабылын министиэристибэтин бэрэстэбиитэллэрэ Москваҕа оробуочай сырыы кэмигэр киин куорат судаарыстыбаннай тэрилтэлэригэр сырыттылар.
edersaas.ru
Чуолаан, СӨ доруобуйа харыстабылын миниистирэ Елена Борисова, министиэристибэ үлэтин хааччыйар управление дириэктэрэ Альберт Жирков уонна булгуччулаах медицинскэй страховка территориятааҕы пуондатын дириэктэрэ Александр Горохов Саха сиригэр доруобуйа харыстабылын модернизациялааһын боппуруостарын дьүүллэстилэр.
Ол иһигэр, “Бэс Чагда” санаторий салалтатын, Булгуччулаах медицинскэй страховка федеральнай пуондатын бэрэссэдээтэлэ Наталья Стадченколыын көрүстүлэр. Саха сирин дэлэгээссийэтэ хаачыстыбалаах медицинскэй көмөҕө, эминэн хааччыйыы систиэмэтин модернизациялааһыҥҥа, санитарнай авиацияҕа сыһыаннаах кэскиллээх этиилэри киллэрдилэр. Ону сэргэ, 2019 сылга “Доруобуйа харыстабыла” национальнай бырайыак уонна 2020-2021 сс. былааннара болҕомтоҕо ылылыннылар.
РФ Доруобуйатын харыстабылын министиэристибэтигэр буолбут сүрүн көрсүһүүгэ РФ доруобуйа харыстабылын миниистирин солбуйааччы Татьяна Яковлева, РФ Федеральнай Мунньаҕын Судаарыстыбаннай Дууматын дьокутаата Галина Данчикова, СӨ доруобуйа харыстабылын миниистирэ Елена Борисова уонна Альберт Жирков кытыннылар. Саха сиригэр доруобуйа харыстабылын дьоһун суолталаах эбийиэктэрин, искэни эмтиир өрөспүүбүлүкэтээҕи киин 2-с уочаратын “Искэн ыарыыларын утары охсуһуу” национальнай бырайыакка киллэриини сүбэлэстилэр. Манна даҕатан эттэххэ, Татьяна Яковлева 2016 сыллаахха Саха сиригэр ыраах сытар улуустар ыарыыны эмтиир-сэрэтэр тэрилтэлэрин үлэлэрин көрө-истэ уонна санитарнай авиация сайдыытын сайыннарар боппуруостары дьүүллэһэ кэлэ сылдьыбыта.
Елена Борисова үлэлиир саастаах нэһилиэнньэ сүрүннээн сүрэх-тымыр уонна искэн ыарыыларыттан өлөрүн бэлиэтээн туран, бу ыарыылары эмтиир кииннэри тутарга соруктаах үлэ барарын бэлиэтээтэ.
РФ Үпкэ министиэристибэтигэр национальнай бырайыактары үбүлээһин боппуруоһа турда. Ону сэргэ оробуочай бөлөх СӨ бырабыыталыстыбатын бэрэссэдээтэлин бастакы солбуйааччы, РФ Президенин иһинэн СӨ Бастайааннай бэрэстэбиитэлэ Андрей Федотов ыыппыт мунньаҕа судаарыстыбаннай былаас уорганнарын кытары хардарыта бииргэ үлэлээһиҥҥэ ананна. Түмүккэ Саха сирин дэлэгээссийэтэ РФ Судаарыстыбаннай Дууматын доруобуйа харыстабылыгар кэмитиэтин бастакы медицинскэй көмөнү оҥоруу боппуруостарыгар аналлаах “төгүрүк остуолугар” кытыннылар.
Надежда ЕГОРОВА, “Саха сирэ” edersaas.ru