Доруобуйа харыстабылыгар сыһыаннаах ыйытыыларгытыгар хоруйдары тута ылыаххыт
Саха Өрөспүүбүлүкэтигэр доруобуйа харыстабылын ыйытыыларыгар “суһал линия” киллэрилиннэ. Бу туһунан СӨ бырабыыталыстыбатын бэрэссэдээтэлэ Владимир Солодов фейсбукка страницатыгар иһитиннэрдэ.
«Саха сиригэр доруобуйа харыстабыла — Саха сирин олохтоохторун хараҕынан” диэн “суһал линия” баар буолла. Манна нэһилиэнньэ сэҥээрэр ыйытыыларыгар сөптөөх, кырдьыктаах хоруйдар суһаллык бэриллиэхтэрэ. Ону сэргэ, кинилэртэн киирэр этиилэр үөрэтиллиэхтэрэ.
Билигин, чуолаан, өрөспүүбүлүкэ балыыһаларын сабыы, үлэһиттэри сарбыйыы туһунан кэпсэтии нэһилиэнньэни эрэ буолбакка, исписэлиистэри эмиэ улаханнык долгутар. Онуоха, араас социальнай ситимнэр көмөлөрүнэн доруобуйа харыстабылыгар сыһыаннаах боппуруостары дьон элбэхтик ырытыһар, дьүүллэһэр. Онно бүтэһиктээхтик бигэргэммэтэх, сымыйа сурахтар да тарҕанан, нэһилиэнньэни аймыыллара кистэл буолбатах. Онуоха бириэмэтигэр аһыллыбыт “суһал линиянан” нэһилиэнньэ сөптөөх хоруйу ылыаҕар эрэл үөскээтэ.
Ыйытыыларгытын үлэ кэмигэр +79627383760 ватсабынан ыытыаххытын сөп. Онуоха, бэйэҕит толору ааккытын-суолгутун уонна медицинэ тэрилтэтан аадырыһын суруйаргытын умнумаҥ. Хаартысканан уонна видеонан устуулары ыытыаххытын эмиэ сөп.
Надежда ЕГОРОВА, “Саха сирэ” хаһыат, edersaas.ru