Доруобуйа харыстабылын салаатыгар федеральнай бүддьүөттэн 6,5 млрд солк. көрүллүөҕэ

Бөлөххө киир:

2021-2023 сылларга доруобуйа харыстабылын бастакы звенотун саҥардыыга федеральнай бүддьүөттэн 6,5 млрд солк. көрүллүөҕэ. Бу туһунан Ил Дархан Айсен Николаев инстаграмҥа тус страницатыгар суруйда.

«Былырыын Калининградка ыытыллыбыт Госсэбиэт Президиумун доруобуйа харыстабылыгар ыытыллыбыт мунньаҕар доруобуйа харыстабылын бастакы звенотун саҥардыы боппуруостарын тула кэпсэппиппит. Онно дойду Аҕа баһылыга Владимир Владимирович Путин биһиги этиилэрбитин өйөөбүтэ. Онтон билигин федеральнай бүддьүөттэн өрөспүүбүлүкэҕэ 6,5 млрд солк. көрүллэр буолла», — диэн Айсен Николаев суруйда.

Доруобуйа харыстабылын министиэристибэтэ иһитиннэрбитинэн, 2021 сылга үп-харчы ФАП-ры уонна врачебнай амбулаториялары тутууга ыытыллыаҕа. Ол курдук 10 нэһилиэккэ, ол иһигэр Абый Кэбэргэнэтигэр, Кэбээйи Сиэгэн Күөлүгэр, Орто Халыма Өлөөкө Күөлүгэр.

Уус Маайаҕа, Чурапчыга уонна Муома улуустарыгар оройуоннааҕы киин балыыһалары, Таатта Ытык Күөлүгэр поликлиниканы тутуу саҕаланыаҕа. Бүлүү куоракка хирургическай отделениены тутуу салгыы ыытыллыаҕа.

Маны таһынан Алдан, Аллайыаха, Булуҥ, Үөһээ Халыма, Бүлүү, Горнай, Ленскэй, Мииринэй, Нам, Нерюнгри, Ньурба, Өймөкөөн, Өлүөхүмэ, Өлөөн, Таатта, Томпо, Усуйаана, Хаҥалас уонна Эбээн Бытантай улуустарын киин балыыһаларын уонна поликлиникаларын хапытаалынай өрөмүөнүгэр үп-харчы тыырыллыаҕа.

СӨ Ил Дарханын уонна Бырабыыталыстыбатын пресс-сулууспата