Ил Дархан доруобуйа харыстабылыгар улахан үп көрүллэрин ситистэ

РФ булгуччулаах медицинскэй страховкатын федеральнай пуондатын бэрэссэдээтэлэ Наталья Стадченко бэҕэһээ РФ Судаарыстыбаннай мунньаҕын доруобуйа харыстабылыгар кэмитиэтин мунньаҕар Саха сирин нэһилиэнньэтигэр сыһыаннаах үөрүүлээх иһитиннэриини тириэртэ.

edersaas.ru

Ол курдук, дойду доруобуйатын харыстабылын салаатын үбүлээһиҥҥэ субвенцияны 8 миллиард солкуобайынан улаатыннарар туһунан быһаарыы ылылынна. Онуоха медицинскэй страховка федеральнай пуондатын салайааччыта 8 миллиард солкуобайтан 6 млрд 685 мөл. Саха Өрөспүүбүлүкэтигэр биэрэргэ быһаарда.

Онон, Саха сирин уонна Уһук Илин атын регионнарын доруобуйаларын харыстабыла ситэри үбүлэммэт кыһалҕалара дьэ, оннун-сүнньүн булуох курдук. Билигин өрөспүүбүлүкэ дьаһалтата Булгуччулаах медицинскэй страховка территориятааҕы пуондатын үбүлээһинин кээмэйин улаатыннарар туһунан сокуон барылын номнуо бэлэмниир.

Манна сыһыаран эттэххэ, өрөспүүбүлүкэ бырабыыталыстыбата уонна парламена федеральнай киинтэн уонча сыл устата туруорсубут боппуруостара өрөспүүбүлүкэ саҥа баһылыга Айсен Николаев өҥөтүнэн ситиһилиннэ.

Үбүлээһини улаатыннарыы эбэтэр үбү хос тыырыы?

Бэйэ-бэйэлэриттэн сүүһүнэн килэмиэтир тэйиччи сытар сирдэрдээх Саха сирэ ураты усулуобуйаны уонна үбүлээһини эрэйэр. Онуоха ыраах сытар нэһилиэнньэлээх пууннарга суукканы быһа үлэлиир куойкалары хааччыйарга доруобуйа харыстабылын үбүлээһин ньыматын уларытыахха наада этэ. Олортон биирдэстэринэн хотугу сир медицинатын көмүскүүргэ бүддьүөт ороскуоттарын индексин таһымын (ИБР) уларытыы буолар.

Былааннаммыт куойкалары көрүүгэ Булгуччулаах медицинскэй страховка пуондатыттан субвенция көрүллэр.

РФ 85 субъегыттан дойду 5 региона, ол иһигэр Саха сирэ, Камчатка кыраайа, Магадан уобалаһа уонна Чукотка автономнай уокуруга, куруук федеральнай пуондаттан ситэри үбүлэммэттэрэ. Чуолаан, Саха сирэ сыл аайы 3,8 млрд. солкуобайы сүтэрэрэ уонна дьоҕус балыыһалар сабыллыбаттарын туһугар өрөспүүбүлүкэ бүддьүөтүттэн хааччыйара.

Саха сирин баһылыга Айсен Николаев РФ Бэрэссэдээтэлэ Дмитрий Медведевкэ, РФ үбүн миниистирэ Антон Силуановка, РФ доруобуйа харыстабылын миниистирэ Вероника Скворцоваҕа, Булгуччулаах медицинскэй страховка пуондатын бэрэссэдээтэлэ Наталья Стадченкоҕа уо.д.а. субвенциялары тыырыы ньыматын уларытар туһунан суругу көҕүлээччинэн буолбута. Кини ону сэргэ атырдьах ыйыгар Петропавловскай-Камчатскайга Уһук Илин уонна Байкал регионун социальнай-экономическай сайдыытын боппуруостарыгар аналлаах бырабыыталыстыба хамыыһыйатын мунньаҕар ити кыһалҕаны дакаастаабыта. Кини этиитин РФ Бырабыыталыстыбатын бэрэссэдээтэлин солбуйааччы – Уһук Илиҥҥэ РФ Президенин боломуочуйалаах бэрэстэбиитэлэ Юрий Трутнев уонна Уһук Илин сайдыытыгар РФ миниистирэ Александр Козлов өйөөбүттэрэ. Бу балаһыанньаттан тахсарга икки этии киирбитэ: бу регионнарга үбүлээһини улаатыннарыы эбэтэр үбү хос тыырыы.

Мунньах түмүгүнэн Дмитрий Медведев РФ Доруобуйа харыстабылын министиэристибэтэ кэккэ министиэристибэлэри кытары субвенцияны тыырыы ньыматыгар уларытыылары киллэрэр туһунан боппуруоһу үөрэтэллэригэр сорудахтаабыта.

РФ биэс субьегар бүддьүөт ороскуоттарын муҥутуур үрдүк индексин олохтуурга соруйбута.

Онон, дойду хотугу регионнарын доруобуйатын харыстабылыгар үгүс сылларга кыһалҕаны үөскэппит боппуруос дьэ, быһаарылынна.

Надежда ЕГОРОВА, «Саха сирэ» хаһыат, edersaas.ru