Өрөспүүбүлүкэҕэ 2025 сылга диэри доруобуйа харыстабылыгар 70-тан тахса эбийиэк тутуллара былааннанар.
Биэссэр-акушер пууннара, амбулаториялар, балыыһа комплекстара уонна поликлиникалар «Доруобуйа харыстабыла» национальнай бырайыак чэрчитинэн тутуллуохтара диэн СӨ Доруобуйа харыстабылын министиэристибэтин пресс-сулууспата иһитиннэрэр.
Чэбдигирии сылыгар тутуулар Чурапчы, Таатта, Муома, Уус Маайа, Хаҥалас, Ньурба, Нам, Алдан, Верхоянскай, Абый, Кэбээйи, Орто Халыма улуустарыгар саҕаланыахтара. Ону сэргэ, Бүлүүгэ балыыһа комплексын тутуу салҕаныа.
Онон 2025 сылга диэри 70-тан тахса амбулатория уонна биэссэр-акушер пууннара тутуллаллара, 70-тан тахса эбийиэккэ хапытаалынай өрөмүөн ыытыллара уонна 12 бөдөҥ тутуу былааннаналлар.
Манна даҕатан эттэххэ, эрэгийиэҥҥэ 2018 сылтан биэссэр-акушер пууннара, амбулаториялар, барыта 33 тутуу үлэҕэ киирбит. Үүнэр көлүөнэ тус сыаллаах пуондата «Алроса» хампаанньа үбүнэн кыттыытынан, Верхоянскай улууһугар Баатаҕайга 180 киһи көрдөрөр балыыһалаах поликлиникатын тутуута түмүктэммит.
Кардиологическай уонна онкокиини тутуу үлэлэрэ салҕаналлар. Маны сэргэ Дьокуускайга өрөспүүбүлүкэтээҕи килиниичэскэй инфекционнай балыыһаны тутууну саҕалыырга бырайыактыыр-сметнай докумуон оҥоһуллар. «Доруобуйа харыстабыла» национальнай бырайыагынан өрөспүүбүлүкэҕэ искэн ыарыытын эмтииргэ көмөлөһөр амбулаторнай киини (ЦАОП) аһарга үлэ салҕанар. 2019 сылтан саҕаланан 2020 сыл бүтүөр диэри былааннаммыт итинник 18 киинтэн (ЦАОП) 12 баар. Ол курдук, былырыын Бүлүүгэ, Өлүөхүмэҕэ, Покровскайга, Ленскэйгэ аһыллыбыттар. Оттон хаалбыт алтаны 2024 сылга диэри аһар былааннаахтар.
+1
+1
+1
+1
+1
+1
+1