«Өрөспүүбүлүкэтээҕи медицинскэй профилактика киинэ» судаарыстыбаннай бүддьүөт тэрилтэтин «Здоровье» киинин биригээдэтэ Эбээн-Бытантай национальнай улууһуттан кэллэ. Саха сирин сорох нэһилиэнньэлээх пууннара суола-ииһэ суох ыраах сиргэ сытар буоланнар, нэһилиэнньэ бырааска көрдөрөрө олус уустук. Өрөспүүбүлүкэҕэ “доруобуйа десана” (“медицинский десант”) үлэлиэҕиттэн ыраах, суола-ииһэ мөлтөх нэһилиэнньэлээх пууннар олохтоохторо миэстэтигэр үрдүкү категориялаах быраастарга көрдөрүөхтэрин сөп.
Быраастар Эбээн-Бытантай улууһугар алта күн үлэлээтилэр. Бу кэм иһигэр Саккырыыр, Кустуур уонна Дьарҕаалаах сэлиэнньэлэрин 605 олохтооҕо (18-80 саастаах дьон) тустаах быраастарга көрдөрбүттэр. Кардиолог уонна УЗИ быраастар уһук хоту эмтиир тэриллэрин барытын илдьэ сылдьыбыттар. Бу түмүгэр былчархай үлэтигэр кэһии тахсыбытын, сүрэх, тымыр ыарыыларын уонна ис-үөс ыарыыларын буллулар. 15 ыарыһаҕы салгыы Дьокуускайга эмтэнэ баралларыгар сүбэлээтилэр.
2018 сыл устата “доруобуйа десана ” 11 улууһу, 42 нэһилиэнньэлээх пууну хабан, 4 тыһыынча кэриҥэ киһини көрдө.
Бэлиэтээн эттээххэ, тустаах бырайыак 2009 сылтан саҕалаан үлэлиир уонна сылтан сыл тупсан, ситэн иһэр. “ Доруобуйа десана” “Ыарыыны сэрэтии уонна чөл олоҕу түстүүр, медицинскэй-санитарнай көмө сайдыыта” диэн өрөспүүбүлүкэтээҕи бырагыраама уонна “Чөл олоҕу түстээһин” диэн өрөспүүбүлүкэтээҕи бырайыак быһаччы көмөтүнэн ыытыллар.
edersaas.ru