Олунньу 27-кулун тутар 8 күннэригэр өрөспүүбүлүкэҕэ национальнай “Доруобуйа күнүн” чэрчитинэн, Доруобуйа дэкээдэтэ ыытыллыаҕа. СӨ бэрэсидьиэнин 2000 сыл тохсунньу 17 күнүнээҕи 945 -дээх ыйааҕынан, олунньу бүтэһик баскыһыанньатыгар национальнай Доруобуйа күнэ бэлиэтэнэр.
Ол курдук, олунньу 25 күнүгэр “Туймаада” атыы-эргиэн киинигэр аахсыйа ыытыллыа. Манна баҕалаах киһи барыта терапевт-бырааска көрдөрүнэр, дабылыанньатын, сатурациятын, саахарын, холестеринын кээмэйдэтэр, В,С гепатитка, ВИЧ, Luis ыарыыларга анаалыс туттарар, сүбэ-ама ылар кыахтаах. Уопсастыбаннай доруобуйа, ыарыыны сэрэтэр киин, “СПИД-киин” быраастара үлэлиэхтэрэ. Миэдик-волонтерадар флеш-мобка үҥкүүлээн, дьону сэргэхстиэхтэрэ.
Балыыһаларга, поликлиникаларга “Ийэ доруобуйата”, “Доруобай буол!”, “ВИЧ-статускун бил”, “Көхтөөх уһун үйэлэниигэ бииргэ” аахсыйалар, диспансеризация, чинчийэн көрүүлэр ыытыллыахтара. Бары тэрээһиннэргэ санитарнай миэрэлэри кытаанахтык тутуһуу ирдэнэр.
Үөрэх тэрилтэлэригэр доруобуйаҕа, быһыыны ылыыга, ыарыылары сэрэтэргэ, чөл олоҕу тутуһарга, о.д.а. араас лиэксийэлэр ыытыллыахтара.
Перинатальнай кииҥҥэ, акушер отделениеларыгар, дьахтар консультацияларыгар диетолог-нутрициолог быраастар Сөпкө аһааһын оскуолаларын үлэлэтиэхтэрэ, лиэксийэлэри ааҕыахтара, углеводтан тутулуктаах буолууттан аккаастанарга маастар-кылаастары ыытыахтара.
Доруобуйа дэкээдэтин чэрчитинэн, биир ыйы быһа чөл олоххо, сөпкө аһыырга үөрүйэхтэри үөскэтэр марафон ыытыллан, дьоҥҥо туһалыаҕа. Холобур, чөл олохтоох киһи диэн – арыгыттан, табахтан, наркотиктан аккаастаммыт киһи диэн буолбатах, кини – физкультуранан дьарыктанар, хамсанар-имсэнэр, куһаҕан-үчүгэй аһылыгы араарар, саахары, углеводу сиирин аҕыйаппыт киһи буолар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru