Бу күннэргэ доруобуйатынан хааччахтаах дьоҥҥо анаммыт араас ис хоһоонноох күннэр ыытылла тураллар.
edersaas.ru
Өрөспүүбүлүкэтээҕи инбэлиит устудьуоннар үөрэнэр тиэхиньикум-интэринээккэ араас хайысхалаах эбии үөрэхтээһин ыытыллар.
Бу туһунан үөрэх тэрилтэтин эбии үөрэхтээһиҥҥэ педагога Мария Слепцова кэпсиир:
— Инбэлиит устудьуоннарга анаан туочуканан уруһуй (точечная роспись) куруһуога үлэлээбитэ балтараа сыл буолла. Ыччаттар национальнай харысхаллары оҥороллорун таһынан, араас хартыыналары уруһуйдууллар.
Айар үлэ буолан, оҕолор ис сүрэхтэриттэн ылларан үлэлииллэр. Бу үлэ көрүҥэ доруобуйаларыгар хааччахтаах ыччаттар айар куттарын уһугуннарарын таһынан, доруобуйаларын бөҕөргөтөр диэххэ сөп, тулууру дьулууру иитэр. Маны таһынан, оҕолор ураты болҕомтолоох буолаллар.
Үөрэнээччилэрим дьоһуннаах ситиһиилэриттэн учуутал киһи олус үөрэбин.
Инбэлиит устудьуоннар үөрэнэр тиэхиньикум-интэринээт ыччата куораттааҕы эрэ буолбакка, өрөспүүбүлүкэтээҕи быыстапкаларга кыттан лауреат, дипломант аатын ылаллар.
Үгүстэр хартыыналара сүгүрүйээччилэрин булан, атыыга кытта бараллар.
Ити курдук, доруобуйаларыгар хааччахтаах ыччат айар кутун уһугуннарыыга эбии үөрэхтээһин өйөбүлэ сүҥкэн.
Елена ПОТОЦКАЯ, «Саха сирэ» хаһыат, edersaas.ru