Доруобуйа харыстабылын миниистирэ араадьыйаҕа быһа эпииргэ нэһилиэнньэ ыйытыытыгар хоруйдаата
Алтынньы 16 күнүгэр “Саха” НКИХ «Тэтим» араадьыйа «Былааһы кытта кэпсэтии» биэриитигэр доруобуйа харыстабылын миниистирэ Елена Борисова быһа эппиргэ тахсан, өрөспүүбүлүкэҕэ коронавирус дьаҥын утары охсуһуу, сэрэтии уонна эмтээһинин туһунан кэпсээтэ.
edersaas.ru
Саха сиригэр ыарыы туругун, мэдиссиинэ пандемия кэмигэр туох дьаһалы ыытарын, «Доруобуйа» национальнай бырайыак олоххо киириитин, эһиилги сылга туох былаан баарын туһунан иһитиннэрдэ.
Елена Борисова быһа эпииргэ дьон-сэргэ билиҥҥи кэмҥэ сытыы, долгутар ыйытыыларыгар хоруйдаата.
Ол курдук, нэһилиэнньэни сүрүннээн коронавирус анаалыһын тутуу, компьютернай томографияны ааһыы уонна анаалыс түмүгүн түргэтэтии боппуруостара үүйэ-хаайа туттулар.
Миниистир этэринэн, билиҥҥи туругунан туох баар лабораториялар күнүстэри-түүннэри үлэлиир буоланнар, ноҕуруускалара улахан. Онон дьону баҕа өттүнэн анаалыс туттарарга ыксаабаттарыгар ыҥырда.
“Быраас эрэ анаалыска, КТ аппаракка түһэргэ аныыр бырааптаах. Ол да буоллар Дьокуускайга бу күннэргэ эбии 100 куойка тэриллиэҕэ. Бу, бастатан туран, ыарахан туруктаах ыарыһахтарга ананыаҕа. ПЦР-лаборатория үлэтэ күүһүрүөҕэ, анаалыс түмүгүн 3-4 күнүнэн билэр буолуохпут», — диэн эттэ.
Кини коронавирус тыынар уорганнар атын да ыарыыларыттан уратыта суох дьайыылааҕын, ол эрээри механизма атын диэн бэлиэтээн эттэ. Өскөтүн ОРВИ пневмонияҕа кубулуйуон эмиэ сөп буоллаҕына, Ковид-19 уратыта тыҥанан буолбакка, тымырдарынан киирэр диэн миниистир быһаарда. «Бу ыарыыны бастаан утаа вируһу утары эминэн эмтээн саҕалыыбыт. Анаалыс түмүгэ билиннэҕинэ эрэ, чопчу дьайыылары оҥорор бырааптаахпыт».
Маны сэргэ хас да киһи быһа эпииргэ эрийэн, коронавирустан атын ыарыыны эмтииргэ тоҕо болҕомто суоҕун туоһуластылар. Елена Борисова былааннаах көрүү үлэлиир, ол эрээри үгүс быраас ковиды кытта охсуһар буолан, «суһал көмөнү» ирдээбэт түбэлтэлэргэ күүттэриилээх буолуон сөп диэн хоруйдаата.
Уопсайынан, мэдиссиинэ коронавируһу утары охсуһарга үөрэннэ эрээри, дьон-сэргэ аһары ыгылыйара, долгуйара баар суол. Миниистир дьон арыый дьиссипилиинэлээх буоларыгар ыҥырда, уустук кэмҥэ бэйэ-бэйэҕэ харыстабыллаах сыһыан олус улахан суолталаах диэн бэлиэтээтэ.
Ковиды утары эмп, вакцина боппуруостара эмиэ киирдилэр. Елена Борисова аптекаҕа «Арбидол» суоҕар «Умифеновир» диэн аналогы туттуҥ диэн сүбэлээтэ. «Хас биирдии препарат анал бэрэбиэркэни ааспыт уонна сертифицированнай буолуохтаах. Росздравнадзор бигэргэппит эрэ эмин туттар наада. Итиэннэ хайаан да бырааһы ыҥыран, эмтэнии бэрээдэгин суруйтарыҥ. Бэйэ эмтэниитинэн дьарыктанар сыыһа. Билиҥҥи ыктарыылаах кэмҥэ дьон ыксыырын өйдүүбүн. Ол да буоллар араас экспресс-тестэргэ итэҕэйимэҥ. Бу чахчы быһаарар диэн чуолкай дакаастана илик», — диэн тоһоҕолоон эттэ.
Түмүккэ, үс сүрүн харыстанар ньыманы — мааска кэтиитин, социальнай дистанцияны тутуһууну уонна илиини суунууну кытаанахтык тутуһуҥ диэн ыҥырда.
Ирина Ханды, “Саха сирэ” хаһыат, edersaas.ru