Ыарахан балаһыанньаҕа түбэспит дьиэ кэргэттэртэн 24 ийэ доруобуйатын туругун көрдөрүнэригэр Ийэ сылыгар анаммыт социальнай аахсыйа ыытылынна. Ийэлэр Өрөспүүбүлүкэтээҕи уопсастыбаннай доруобуйа уонна ыарыыны сэрэтии киинигэр көрдөрүннүлэр.
“Доруобай ийэ” социальнай аахсыйаны «Молодежь – энергия развития города Якутска 2022» дьыалабыай оонньуу кыттааччылара тэрийдилэр. Ийэлэр испииһэктэрин үлэ, социальнай сайдыы министиэристибэтэ биэрбит.
Аахсыйаҕа дьахталлар сүрэхтэрин, тыҥаларын туругун бэрэбиэркэлэннилэр, хааҥҥа саахар, холестерин таһымын билэргэ анаалыс туттардылар. Дабылыанньаларын, хаан кислородунан хааччыллыытын кээмэйдэттилэр. Ону тэҥэ, терапевт, онколог-маммолог, УЗИ-быраастарга көрдөрүннүлэр.
Дьокуускай куораттааҕы «Молодежь – энергия развития города Якутска 2022» дьыалабыай оонньуу бастакы түһүмэҕэ кулун тутар 21-27 күннэригэр ыытыллыбыта. Оонньуу чэрчитинэн, эдэр дьон маннык социальнай аахсыйалары, уопсастыбаннай тэрээһиннэри тэрийэн ыыталлар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru