Тохсунньу 12 күнүгэр Ил Дархан Айсен Николаев социальнай ситимҥэ блогердары кытары көрсөн кэпсэттэ.
Хомуска импровизатор оонньооччу, вайнер, блогер Владимир Дормидонтов – айар ыччат чаҕылхай бэрэстэбиитэлэ. Кини Щепкин аатынан театральнай училище устудьуона, пандемия саҕаланыаҕыттан көрдөөх вайннары устан саҕалаан, дьон кутун туппута. Кини барыта холбоон 200 тыһыынча кэриҥэ сурутааччылаах блогер, Арассыыйаҕа “1000 бастыҥ блогер” ахсааныгар киирбитэ.
Кини Ил Дарханы кытары аһаҕас кэпсэтиигэ этиилэрдээх кэлбит. Бастатан туран, Дьокуускайга айар ыччакка мустар, сүбэлэһэр сир баар буоларын туруоруста. Онуоха Айсен Сергеевич киин куоракка креативнай кластер уонна оҕону сайыннарар киин тутуллуохтааҕын туһунан иһитиннэрдэ.
Ону тэҥэ, Владимир саха тыла сүппэтин, симэлийбэтин туһугар, ыччат дьон, оҕолор төрөөбүт тылларын билэр, киэн туттар буолуохтарыгар ис сүрэҕиттэн ыалдьарын, кыһалларын кэпсээтэ.
— Ыччат нуучча, омук тылын булкуйбакка, сахалыы ыраастык саҥарыаҕын, оһуохайы, олоҥхону интэриэһиргиэҕин баҕарабын. Мин санаабар, хайдах эрэ тылбыт симэлийэн эрэр курдук. Сахалыы тыыны иҥэрэргэ туһуламмыт бырайыактары бырабыыталыстыба өйүө дуо?
— Владимир, хаһан да тылбыт, норуоппут сүтэн, симэлийэн эрэр диэн этиигэ итэҕэйбэт буол. Улууканнаах улахан сири баһылаан олоробут, үгүс үйэлэри уҥуордаан кэлбит тылбытын, култуурабытын тутан кэллибит, саха норуотун аатын ааттатабыт. Билигин ол тылбытын, култуурабытын харыстыырга, сайыннарарга үлэлиэхтээхпит. Үп-харчы көрөн, тыл туһунан судаарыстыбаннай бырагыраама ылыллан, үлэлии турар. Оҕолору саха тылыгар үөрэтиини судаарыстыба эрэ кыһалҕатын курдук көрбөккө, дьиэ кэргэҥҥэ иитэн-үөрэтэн, бары бииргэ тылбытын харыстыаххайыҥ, — диэн Айсен Николаев хоруйдаата.
Блогер биир дойдулаахтарын, Сунтаар улууһун Хадан нэһилиэгин олохтоохторун көрдөһүүлэрин тиэртэ: кинилэр култуурунай-спортивнай киин тутулларын туруорсаллар, бырайыага, былаана бэлэм эбит. Ил Дархан бу боппуруоһу көрүөх буолла.
Түмүккэ Владимир “ТикТок” социальнай ситимҥэ Ил Дарханы кытары бииргэ вайн устуоҕун баҕарарын эттэ. Онуоха Айсен Сергеевич сөбүлэстэ.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн