Интэриэһинэй

Дорхоон Дохсун «Хотуур хоһууна» бырайыага Балыктаах Дьохутугар үлэлээтэ

Бу күннэргэ  Мэҥэ Хаҥалас Балыктааҕар эдэр фермер Дьулустаан Говоров оттуур Дьоху алааһыгар Дорхоон Дохсун Ворогушин салайар «Хотуур Хоһууна» бырайыагын үлэлэттэ.

Бу туһунан биһиги уопсастыбаннай кэрэспэндьиэммит, Балыктаах орто оскуолатын учуутала Ангелина Говорова бу курдук кэпсээтэ:

Бырайыак кыттааччылара: Майаттан Эрсан Сыроватскай, Дэлэгэй Жирков,  Эрэл Иванов,  Мичил Николаев,  Володя Петров,  Коля Григорьев, Балыктаахтан  Витя Ноговицын  бэйэлэрэ хотуурдаах кэлэн, илиинэн от оҕустулар.

Охсубут отторун эмиэ илиинэн кыраабыллаан, мунньан — барыта 3 оту туруордулар. Көмөлөһөөччү  Иннокентий Лебедев, салайааччы Дорхоон Дохсун өбүгэ саҕаттан туттуллар от тэрилин  — хотуурунан охсуу сатабылын уолаттарга анаан көрдөрөн үөрэттилэр, эттэрин-сииннэрин эрчийдилэр.

 

Минньигэс аһынан кинилэри Анелия Саввинова аһатта. Бу үтүө хамсааһыны өйөөбүт киһинэн Майа сэлиэнньэтин баһылыга Дмитрий Тихонов буолар. Эдэр салайааччы бэйэтин курдук ыччаттар бары көҕүлээһиннэрин өйүүр, өйдүүр буолан,  оҕолор санаалара кэлэн, сайдыыга туһуламмыт сонун сүүрээннэри тобулаллар.

 

 Эдэр пиэрмэр  Дьулус Говоров кыра эрдэҕиттэн Дорхоон Дохсун уонна этнопедагог Анна Холмогорова  салайар  «Төлкө» лааҕырдарыгар, уһуйааннарыгар иитиллэн тахсыбыт буолан, учуутала ыытар үлэтин олус сэргиир уонна өйүүр.  Кэнэҕэс эдэр киһи уһуйааччыта уол оҕону үлэнэн  иитэр ньыматын өйүүр, кинини кытта саҥа бырайыактары олоххо киллэрэр былааннаах.

Бу курдук   учуутал уонна үөрэнээччи бэйэ-бэйэлэрин сүтэрсэн кэбиспэккэ, сүбэлэрин бииргэ холбоон үлэлиириттэн киһи киэн туттар. Быйылгы курдук уустук кураан сайыҥҥа обургу оҕолорр окко көмөлөһөн, эдэр пиэрмэри өйөөн абыраатылар.

 

Елена ПОТОЦКАЯ, «Саха сирэ» хаһыат.

 

Хаартыска — Ангелина Говорова тиксэриитэ.

0
0
Telegram @edersaas20