Мииринэй оройуонугар дьону кутталга олордубут бу тэрээһиннээх бөлөххө Саха сириттэн эрэ буолбакка, Арменияттан, Дагестантан уонна Казахстантан төрүттээхтэр киирбиттэр.
Интернациональнай бөлөх чилиэннэрин РФ Куттал суох буолуутун федеральнай сулууспатын Саха сиринээҕи управлениетын (УФСБ) оперативниктара туппуттар.
Барыллаан быһаарыынан, бу бөлөх олохтоохтортон харчы түүрэйдээһининэн дьарыктаммыт. Кырбыы-кырбыылар уонна сэби-сэбиргэли туттан туран.
Модьуйууларын толорботохторуна, «бэйэҕитин эрэ буолбакка, чугас дьоҥҥутун эмиэ өлөрүөхпүт-өһөрүөхпүт!» диэн сааналлар-суоһурҕаналлар эбит.
Маны таһынан, бөлөх чилиэннэрэ харчыны хомуйууну хонтуруоллаабыттар. Ол курдук, биир эмсэҕэлээччи дьиэтин атыыта бу бандьыыттар хонтуруолларынан ааспыт.
Баантан кирэдьиити ылааччылары эмиэ бу бөлөх лидерэ уонна чилиэннэрэ кыраҕытык кэтии сылдьыбыттар.
Бу чахчынан РФ Холуобунай кодексатын 163-с ыст. 3-с чааһын «б» пуунунан, ол эбэтэр, түүрэйдээһин бэлиэтэ баарынан, холуобунай дьыала тэриллибит.
Бу туһунан РФ Куттал суох буолуутун федеральнай сулууспатын Саха сиринээҕи управлениетын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: УФСБ пресс-сулууспата.