Бүлүүттэн Донбасс эрэйи-кыһалҕаны көрсүбүт олохтоохторун көмүскүү

Ааптар: 
Бөлөххө киир:

Бу күннэргэ федеральнай сонуннар ханаалларынан дойдуга ыытыллар быстах байыаннай хомууру өйөөн, Госдуматтан, араас эрэгийиэннэртэн дьокутааттар Украинаҕа буола турар байыаннай эпэрээссийэҕэ барар баҕаларын иһитиннэрдилэр.

Итинтэн сиэттэрэн, биһиги Сахабыт сириттэн Бүлүү куоратын дьокутаата, Бүлүүтээҕи психо-неврологическай диспансер миэдигэ Афанасьева Октябрина Семеновна балтараа ый анараа өттүгэр ДНӨ эрэйи-кыһалҕаны көрсүбүт олохтоохторун көмүскүү баҕа өттүнэн барбытын санаан кэллим.

Октябрина Семеновнаны биир дойдулаахтара олус иһирэхтик ахталлар. Кини үтүө санаалааҕын, кэрэни, кэскиллээҕи эрэ ыраланарын, дьон кыһалҕатын өйдүүрүн, көмөлөһөргө өрүү бэлэмин бэлиэтииллэр. Соторутааҕыта биһиэхэ сатыылаан ааспыт коронавирус кэмигэр, кини бу дьаҥы утары туруулаһар үрүҥ халааттаах аанньаллар кэккэлэригэр эмиэ биир бастакынан туруммутун кэпсииллэр.

ДНӨ уонна ЛНӨ дьоно-сэргэтэ унньуктаах аҕыс сыл устата бэйэлэрин көҥүллэрин, этэҥҥэ олорууларын туруулаһалларын олус чугастык, ис иһиттэн аймана ылынара. Ол иһин, бу хорсун норуокка бэйэтин кыаҕынан көмөлөһөр баҕата кинини үүйэ-хаайа туппута. Ол хоодуот санаатын толорон, Октябрина Семеновна ким да күһэйиитэ суох, ыраах Донецкайга байыаннай эпэрээссийэҕэ барарга баҕа өттүнэн барарга суруттарбыта.

Тапталлаах кыыһыгар, аймах дьонугар, чугас дьүөгэлэригэр биллэрэринэн, кини билигин Донбасска сылдьар. Төрөөбүт Сахатын сирин, дьонун-сэргэтин күүскэ таптыырын, ахтарын туһунан иһитиннэрэр, ылыммыт хорсун быһаарыныытыттан кэмсиммэт, санаата күүстээх.
Октябрина Семеновна Афанасьева курдук сырдык ыралаах, үтүө санаалаах хорсун-хоодуот биир дойдулаахтарынан бүлүүлэр киэн тутталлар. Кинини Айыыһыта араҥаччылаатын, харыстаатын, киниэхэ ааттара ааттаммат өбүгэлэрэ өрүү күүс-көмө буола турдуннар диэн алгыыллар!

Күүлэкээн

+1
0
+1
0
+1
0
+1
0
+1
0
+1
0
+1
0