Ыам ыйын 11 күнэ Донецкай Народнай Өрөспүүбүлүкэҕэ ураты күн. Бу күн 2014 сыллаахха автономияны ылыныы туһунан референдум ыытыллан турар. Референдумҥа оччотооҕу Донецкай уобалас нэһилиэнньэтин 75 % тахсан куоластаабыта.
Донецкай Народнай Өрөспүүбүлүкэҕэ ыам ыйын 11 күнэ Өрөспүүбүлүкэ күнүнэн биллэриллэн турар. Олохтоохторго ити күн өрөбүл.
Бэҕэһээ Донецкай куорат киинигэр баар Конституция болуоссатын Арассыыйа дьоруойа, старшай лейтенант Нурмагомед Гаджимагомедов аатынан уларыттылар. Нурмагомед Гаджимагомедов анал операция кэмигэр ротатын быыһаарыы дьоруойдуу өлөн, бэйэтин табаарыстарыгар хорсун быһыы чаҕылхай холобурунан буолбута. Донецкай олохтоохторо болуоссакка кини аата суруллубут табличкатыгар сибэкки дьөрбөтүн уурдулар.
Шахтерскай куоракка Донецкай Народнай Өрөспүүбүлүкэ бастакы баһылыга, эмиэ дойдутун туһугар сырдык тыынын толук уурбут Александр Захарченкоҕа өйдөбүнньүк пааматынньык туруордулар. Үөрүүлээх дьаһалга биэс сүүстэн тахса киһи кытынна. Манна даҕатан эттэххэ, СӨ Ил Дархана Айсен Николаев Кыайыы күнүгэр Дьокуускайга Александр Захарченко аатынан уулусса баар буолуоҕун туһунан иһитиннэрбитэ.
Аграфена КУЗЬМИНА