Туох да диэбит иһин, билиҥҥи кэмҥэ дьону сирэйэ-хараҕа албыннаан, хармааннарын хаҥаттааччылар биллэ элбээтилэр. «Без лоха жизнь плоха», «Сатаа да саһыл саҕалан», «Саха сааппат, ыт харбат» диэн санаанан салайтарар суобаһа суох киһи ахсаана күн-түүн хойдон иһэр курдук. Түөкүннээһин элбии турарын криминальнай статистика да туоһулуур.
Биир оннук холуобунай дьыалаҕа суут уурааҕа тахсыбытын туһунан СӨ Борокуратууратын пресс-сулууспата иһитиннэрдэ.
Ол курдук, суут быһаарбытынан, 2015 сыл сэтинньи-ахсынньы ыйдарыгар «Норд Винд» диэн ааттаах туристическай агентство дириэктэрэбин диэн А. Аммосова диэн гражданка дьону кытта дуогабар түһэрсибит — Филиппиныга уонна Таилаҥҥа уопсайа 998.009 солк. суумалаах путевкалары атыылаабыт.
Дьонтон харчыларын ылан баран, ону барытын бэйэтин тус наадатыгар туттубут. Путевката да, харчыта да суох хаалбыт, албыннаппыт дьону кытта быһаарсартан, көрсүһэртэн куотунан, агентствотын үлэтин тохтоппут.
Суут кинини РФ Холуобунай кодексатын 160-с ыст. 2-с, 3-с чаастарынан, ол эбэтэр, дьон харчытын иҥэриниигэ буруйдааҕынан билинэн, 4 сылга көҥүлүн быһары усулуобунайынан аахсан, 2 сыл 6 ыйга тургутар болдьоххо уурбут.
Маны таһынан, кини сокуоннайа суох дьайыыларыттан эмсэҕэлээбит дьон харчытын төлөттөрөр ирдэбиллэрин толорорго уурбут.
Биһиги корр., «Саха сирэ» хаһыат, edersaas.ru
Хаартыска: интэриниэттэн.