Бүгүн, муус устар 7 күнүгэр, 12:00 чааска Саха сирин бырабыыталыстыбатын бэрэссэдээтэлин солбуйааччы Ольга Балабкина эрэгийиэҥҥэ коронавирус балаһыанньатын туһунан брифиҥҥэ кэпсээтэ.
edersaas.ru
— Ааспыт сууккаҕа өрөспүүбүлүкэ үрдүнэн 29 киһи ыарыйда. Дьокуускайга 20. Биирдии киһи Алдан, Ленскай, Өлүөхүмэ, Мииринэй, Таатта, Томпо улуустарыгар ыарыйдылар.
Нэдиэлэтээҕи кэтээн көрүү иһитиннэрэринэн, дьон ыалдьара биир кэм турар. Аччаабат да, улааппат да. Онон, ОРВИ уонна грипп тарҕанар кэмигэр, ордук сэрэхтээх буоларгытыгар ыҥырабын.
Сууккаҕа 1500 тиэс оҥоһулунна. Нэһилиэнньэни маассабайдык вакцинациялааһын салҕанар. 102 тыһыынча 712 доза уопсайа кэлбитэ. Олортон бастакы вакцинациялааһыны 63 250 киһи номнуо ылла. Быһыыны толору 53 тыһыынча киһи ылбыт. Билигин өрөспүүбүлүкэ саамай ыраах сытар улуустарыгар кытта вакцина тиийдэ. Уопсайа өрөспүүбүлүкэ үрдүнэн, 62,2% вакцина туттулунна.
Арассыыйа үрдүнэн коронавируһунан ыалдьыы таһыма улаханнык түһэ илик. Онон, син биир санитарнай нуормалары тутуһаргыт ирдэнэр, — диэн Ольга Балабкина быһа эпииргэ кэпсээтэ.
Виктория Бястинова, edersaas.ru саайт, «Саха сирэ» хаһыат.
Хаартыска YakutiaDaily.