Арбитражнай суут бэҕэһээ, сэтинньи 1 күнүгэр, федеральнай нолуок сулууспатын ирдэбилинэн “Монолитстрой” ХЭУо дьыалатын көрөн баран, тутуу хампаанньатын моҥкуруутунан биллэрдэ.
Инньэ гынан, Дьокуускай куоракка Автодорожнай уулусса 19-с №-гэр иккис уочаратынан тутуллуохтаах дьиэҕэ 127 кыбартыыраны атыыласпыт өлүүлэһэн тутуу кыттыылаахтара укпут харчыларын “Проминстрах” страховой хампаанньаттан (Москва) ылалларыгар суол аһылынна. Кинилэр тутулла илик, салгыҥҥа баар уораҕайга 282 мөлүйүөн солкуобайы кыттыһан укпуттара. Онтуларын страховкаламмыт хампаанньаларыттан, табылыннаҕына, төттөрү өҕүтүөхтэрэ.
Санатан эттэххэ, “Монолитстрой” ХЭУо бастакы уочаракка 9 этээстээх, 89 кыбартыыралаах дьиэни 2017 сыл 4-с кыбаарталыгар үлэҕэ киллэриэхтээҕин быйыл даҕаны кыаммата. Архитектура уонна тутуу комплексын миниистирэ Павел Аргунов бу дьиэ “дольщиктарын” кытта тутуу хампаанньатын салалтатын сирэй-сирэйгэ көрүһүннэрэн кэпсэтиигэ эһиил хайаан даҕаны ситэрэргэ тылларын ылбыта.
Василий НИКИФОРОВ, «Саха сирэ» хаһыат, edersaas.ru