Коронавирус инфекциятыгар ордук ханна сылдьан сыстыахха сөп эбитий? Бу туһунан ЛОР-килииникэ салайааччыта, медицинэ наукатын кандидата, үрдүк категориялаах быраас Владимир Зайцев ТАСС ааҕыныстыбатыгар кэпсээтэ.
edersaas.ru
Бастакытынан, уопсастыбаннай тырааныспар. Өскөтүн оптуобустары ыраастыыр, сууйар-сотор буоллахтарына, нэһилиэнньэлээх пууннарга айанныыр таксистар массыыналара дьаҥы тарҕатар кутталлаах сиринэн буолар.
Иккиһинэн, коронавирус инфекциятын «уйата» — дьон мустар маҕаһыыннара. Өскө улахан маркеттарга харабынай дьону тохтотон, кыраадыстарын кэмниир, мааскаларын уонна бэрчээккилэрин ирдиир буоллаҕына (бары маҕаһыынарга бу ирдэбил тутуһуллубат), кыра маҕаһыыннарга дьон тоҕуоруһуута үгүс. Манна салгын ыраастаммат, дьон элбээтэҕинэ, кыараҕас буолан, бэйэ-бэйэттэн дьаҥы хабыы куттала улахан.
Үһүс кутталламмыт сир ахсааныгар түүҥҥү кулууптар, сааратар кииннэр киирэллэр. Манна салгын ыраастаммат, киэһэтин ыччат дьон толору мустар. Ирдэбил туһунан этиллибэт даҕаны. Сыстыганнаах дьаҥ сыстыан сөптөөх төрдүс сиринэн киинэ, кэнсиэр тыйаатырдара. Төһө да араас ирдэбили тутуһа сатаабыттарын үрдүнэн, дьон тоҕуоруһан мустан, биир сиргэ өр олорор. Онон коронавирус манна талбыт киһитин хабар куттала суоһуур.
Бэһис кутталлаах сир — ыалдьыбыттара бигэргэммит дьону кытта «ковидка уорбаланар», араас бигэргэммит ыспыраапкаҕа наадыйар доруобай дьон бииргэ алтыһар клиникалара, лабораториялара. Бары биир сиргэ муһуннахтарына, «ковид» кимиэхэ баҕарбытынан көҥүл сыстар.
Онон, күндү доҕоттор, ордук бу этиллибит сирдэргэ сылдьаргытын, айанныыргытын тохтотуҥ.
Бэйэҕитин уонна чуас дьоҥҥутун харыстааҥ!
Елена ПОТОЦКАЯ, «Саха сирэ» хаһыат, edersaas.ru
Хаартыска — ТАСС агенствота.