Дьаҥы бохсууга үлэлиир суһал штаб салайааччытын солбуйааччы Ольга Балабкина уочараттаах брифинин ыытта.
Кини бастатан туран, бүгүн өрөспүүбүлүкэҕэ ыарыы туруоҕуттан бу кэмҥэ диэри 3963 киһи коронавирус дьаҥар хаптарбытын эттэ. Бэс ыйын 25 күнүгэр бу кутталлаах ыарыыга 72 киһи сутуллубут. Дьокуусккай куоракка итинтэн 60 киһи ыалдьыбыт буоллаҕына, Нерюнгрига – 4, Мэҥэ Хаҥаласка – 3, Тааттаҕа -2, ону сэргэ Аммаҕа, Дьааҥыга, Ленскэй оройуоннарыгар – биирдии киһи. Көрөргүт курдук, сыстыганнаах дьаҥ сыыйа оройуоннарга тарҕаныыта бэлиэтэнэр.
Ольга Валерьевна этэринэн, итиниэхэ сайыҥҥы кэм буолан, дьон тыаҕа барыыта, айаннааһына биир биллэр биричиинэнэн буолар.
Хоту улуустарга эмиэ куттал суоһуур эбит. Ордук бырамыысыланнай улуус ахсааныгар киирсэр Дьааҥыга. Ону сэргэ Өлөөҥҥө ыарыы куттала баар.
Бу ыарыы туруоҕуттан үгүстүк төлөпүөнүнэн ыйыталларын бэлиэтээтэ. Дьону-сэргэни ордук туох долгутар эбитий? Стационарга сытан эмтэнэр ордук дуу, тастан эмтэнэр дуу диэн мунааран ыйытааччылар баалларын аҕынна Ольга Валерьевна. Ол, биллэн турар дьон бэйэтин доруобуйатын, дьиэ кэргэнин доруобуйатын туһугар долгуйарыттан, кыһалларыттан тахсар буолуохтаах. “Таһыттан эмтэниигэ да туох да куһаҕан суох, бу барыта ыарыһах дьиссипилиинэтиттэн тутулуктаах уонна ыалдьар киһи кэлиитин-барыытын олоччу аччатыахтаах”, — диэтэ кини быһаччы.
Дьокуускайга ыалдьааччы ахсаана аҕыйаабатын биричиинэтэ ыарыыга, холобур, үлэлиир миэстэтигэр аттынааҕы киһитэ ыалдьыбытыттан сыстыһыы нөҥүө тахсар эбит. Быһата, “корпоративнай” көрүҥ. Уонна дьиэ кэргэн иһигэр ыалдьыыттан. Онон өрүү буоларын курдук, өссө төгүл мааскалаах сылдьарга, илиини кичэйэн суунарга, санитарнай обработканы ыытарга ыҥырда.
Суһал штаб салайааччытын солбуйааччы сүрүн болҕомтотун аармыйаҕа сулууспалыы ыҥырыллааччыларга, оскуоланы бүтэрээччилэргэ уурарга эттэ. Призывниктар бастакы бөлөхтөрө Хабаровскайга көппүт, саҥа ыҥырыыны бэлэмнииллэрин эттэ. Уонна биллэн турар, Конституцияҕа уларытыылары киллэрэргэ куоластааһын саҕаламмытынан бу хампаанньаҕа үрдүк эппиэтинэстээхтик сыһыаннаһыы ирдэнэр. Ити дьон доруобуйатыгар сыһыаннаах боппуруос. Ол иһин бары куоластыыр учаастактарга Роспотребнадзор ирдэбиллэригэр олоҕуран учаастактар куоластыы кэлээччилэри көрсөргө бэлэмнэрин эттэ. Бу учаастактар ирдэбилгэ сөп түбэһиннэрэн, обработкаламмыттар уонна оннук да үлэ ыытыллара чахчы. Хамыыһыйалар чилиэннэрэ ыарыыга тестээһини ааспыттара да тэрээһин үлэтэ үчүгэйин туоһулуур.
“Санааҕытын түһэримэҥ, уолуйумаҥ, өскөтүн температураҕыт таҕыстаҕына, тута “Суһал көмөнү” ыҥырыҥ”, — диэн сүбэлээтэ Ольга Балабкина дьоҥҥо-сэргэҕэ.
Женни СТРЮКОВА
Хаартыска: архыып