Дьон элбэх да чороону мунньар эбит
Олох-дьаһах

Дьон элбэх да чороону мунньар эбит

 Чороон саха ыалыгар былыр-былыргыттан мааны ыалдьыты айах тутарга анаммыт бастыҥ иһитинэн буолар.

edersaas.ru

Аныгы саха ыала чороонтон өрүү аһаабатар да, бу маанылаах иһити сыаналаан, көстүүлээх сиргэ кэккэлэтэн, сандалыга сааһылаан арааһын мунньар.

Дьиэҕэ олорор эрэсиими тутуһан олорор кэмҥэ Өрөспүүбүлүкэ күнүгэр Кэбээйи нэһилиэгин култуурнай сынньанар киинэ тэрийиитинэн (сал. Любовь Семенова) «Нэһилиэкпит саамай элбэх чороонноох ыала» тэттик күрэс тэрилиннэ.

Күрэсхэ 42 ыал кыттыыны ылла. Уопсайа 758 устуука чороон араас көрүҥүн көрдүбүт, — диэн Любовь Семеновна интэриниэт ситимин нөҥүө сонунун үллэһиннэ.

Күрэс кыайыылаахтарынан  58 устуука чороон арааһын көрдөрбүт нэһилиэкпит биир бастыҥ ыала Василий Степанович уонна Валентина Николаевна Ивановтар дьиэ кэргэн буоллулар. Иккис миэстэҕэ балачча чороону дьон-сэргэ көрүүтүгэр таһаарбыт үлэ-хамнас үөһүгэр сылдьар, кэрэни-үтүөнү тарҕатар «Кэрэ эйгэ» оскуолатын үҥкүү салаатын педагогтара Дмитрий Григорьевич, Александра Николаевна Харлампьевтар таҕыстылар. Бу ыал 42 чороонноох. Үһүс бириистээх миэстэҕэ эдэр саастарыттан тыа хаһаайыстыбатын сайыннарыыга бэйэлэрин кылааттарын киллэрбит Степан Степанович, Аграфена Григорьевна Кобяковтар тигистилэр. Маанылаах ыалларбыт 37 чочуонай чороону куонкуруска көрдөрдүлэр.

Тэрээһин көҕүлээччитэ Любовь Семенова бэлиэтээбитинэн, кыайыылаахтары эҕэрдэлээн туран, кэлэктиип аатыттан мобильнай банк нөҥүө харчынан бириистэри ыыппыттар. Онтон дипломнары дьиэҕэ олоруу түмүктэннэҕинэ тиксэриэхтэрэ.

«Саха сирэ» хаһыат, edersaas.ru саайтка анаан

Татьяна МАКСИМОВА—ЛАЗАРЕВА,

Кэбээйи улууһа.

 

1
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

20 − 11 =