“ДОМ.РФ” хампаанньа Дьокуускай сайдыытын докумуонун оҥорууга сүрүн операторынан буолуоҕа
Бүгүн Ил Дархан Айсен Николаев “ТАСС” ыыппыт пресс-конференциятыгар Дьокуускай куорат маастар-былаанын оҥорууга бүтүн Арассыыйатааҕы аһаҕас куонкуруһу биллэрдэ. Бу куонкуруһу Саха сирэ “ДОМ.РФ” хампаанньаны кытары кыттыһан ыытыаҕа.
Пресс-конференция кэмигэр “ДОМ.РФ” хампаанньа генеральнай дириэктэрин солбуйааччы Антон Финогенов иһитиннэрбитинэн, бу маннык улахан былааннары оҥоруу Арассыыйаҕа саҥа сайдан эрэр. Маастар-былаан куораттар генеральнай былааннарын стратегиятын илдьэ сылдьарын таһынан социальнай-экономическай сайдыы сүрүн тосхоло буолар.
– Бу оҥоһуллуохтаах саҥа докумуон – маастар-былаан – аҥаардас кумааҕы эрэ буолбакка, куорат биэс-сэттэ сыл сайдар тосхолунан буолар. Куораты сайыннарыы биир ситимнээхтик барыахтаах, онон бу докумуон бары эйгэни хабыахтаах. Куонкуруска бу эйгэҕэ үлэлэһэр ханнык баҕарар хампаанньа кыттыан сөп. Кыттааччылар куорат сайдыытыгар бэйэлэрин былааннарын, көрүүлэрин киллэрэр толору бырааптаахтар. Маастар-былаан генеральнай былаантан сүрүн уратытынан бу докумуон былаан стратегиятынан уонна социальнай-экономическай сайдыы былаанынан буолар. Ол эбэтэр тупсаран оҥорууну, тутууну уонна дойду экономическай сайдыытын тэҥҥэ илдьэ сылдьар докумуонунан буолар. Маастар-былааны оҥоруу биһиги дойдубутугар саҥа сайдан эрэр. Онон Саха сирэ бу чааһыгар биир бастакылар кэккэлэригэр киирсэр. Дьокуускай Уһук Илин федеральнай уокурукка эрэ буолбакка бүтүн Арассыыйа үрдүнэн тэтимнээхтик сайдан иһэр куорат, – диэн бэлиэтиир Антон Владимирович.
Пресс-конференцияҕа Ил Дархан Айсен Николаев, Саха сирин кылаабынай архитектора Ирина Алексеева, Дьокуускай куорат баһылыга Евгений Григорьев, Кэлэр көлүөнэ пуондатын генеральнай дириэктэрэ Михаил Керемясов, Уһук Илин, Арктика сирин-уотун сайыннарыы департаменын дириэктэрэ Виталий Алтабаев, “Центр” хампаанньалар бөлөхтөрүн хос тэрийээччитэ Сергей Георгиевский кыттыыны ыллылар.
Аграфена КУЗЬМИНА