Дом.РФ баан Уһук Илиннээҕи ипотека ыстаапкатын 1,2%-ҥа диэри түһэрдэ. Бу бырагыраамаҕа Уһук Илин эрэгийиэнигэр олорор 36-гар диэри саастаах ыаллар уонна “Уһук Илиннээҕи гектар” бырагыраама кыттааччылара хапсаллар.
edersaas.ru
Кинилэр баан саайтыгар сайабылыанньа түһэрдэхтэринэ уонна Биэнсийэ пуондатыттан дохуоттарын бигэргэтэр суругу ыыттахтарына, кыра бырыһыаннаах ипотеканы ылыахтарын сөп.
Бу бааҥҥа балаҕан ыйын саҥатыгар 15 миллиард солкуобайтан тахса сууманы ыларга 4 тыһыынчаттан тахса сайаапка номнуо киирбит.
— Бу хаһан да буола илик намыһах бырыһыан. Коронавирус инфекцията тарҕаммытынан сибээстээн, онлайн-сайаапкаларынан үлэлиибит. Онон дьиэттэн тахсыбакка олорон, табыгастаахтык сайаапкаҕытын ыытыаххытын сөп, — диэн “Дом.РФ” баан бырабылыанньатын бэрэссэдээтэлэ Данил Литвинов этэр.
Дом.РФ саайтка сурулларынан, бу маннык 1,2 %-наах ипотеканы ыларга бастакы усунуос 15%, 6 мөлүйүөн солкуобайга диэри сууманы биэриэхтэрин сөп. Атыылаһыллар кыбартыыра бу бырагыраамаҕа аккредитацияламмыт дьиэ-уот испииһэгэр киирбит буолуохтаах.
Бу иннинэ Уһук Илиннээҕи ипотекаҕа 2 %-наах ипотеканы биэрбиттэрэ.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.