«Дьол уйата» Хаҥалас улууһун дьиэ кэргэн сайдыытын өйүүр олохтоох уопсастыбаннай тэрилтэ быйыл Ил Дархан Гранынан өйөбүл ылан үлэтин саҥалыы, таһаарыылаахтык саҕалаата.
Балаҕан ыйын 9 күнүттэн саҕаламмыт бырайыак үлэтин алтынньы 23 күнүгэр «Күһүҥҥү киһи күлбүтүнэн» диэн тыа сирин дьиэ кэргэнэ чөл олох, эбии дохуот киллэриниитин туһунан бастакы тэрээһинэ быһа биэриигэ таҕыста.
Биэриигэ «Дьол уйата» тэрилтэ салайааччыта, элбэх оҕолоох дьиэ кэргэн ийэтэ Светлана Давыдовна Ксенофонтова тэрилтэ үлэтин хайысхаларын сырдатта. Аҕалара Владислав Владимирович Ксенофонтов ыҥырыаны хайдах иитэргэ, көрөргө сүбэ биэрдэ, доруобуйаҕа туһатын кэпсээтэ. Улахан кыыстара үүнээйи арааһын үүннэрэн доруобуйаны тупсарыыга туһанарын уонна эбии дохуот киллэринэрин кэпсээтэ. Ону сэргэ, кини иитэр чоппуускаларын көрдөрдө, соҕурууттан сымыытынан аҕалан инкубаторга таһаарарын туһунан сырдатта. Орто кыыстара битэмииннээх коктейль үс арааһын оҥорон күндүлээтэ уонна туһатын кэпсээтэ.
Хаҥалас улууһун көхтөөх дьиэ кэргэттэрин «Дьол уйата» түмсүүгэ ыҥырабыт. Бу +79141020328 төлөпүөнүнэн тыа сирин дьоно-сэргэтэ билсиэхтэрин сөп.
Ил Дархан Айсен Сергеевич Николаевка, Хаҥалас улууһун баһылыгар Олег Валериевич Иринеевкэ, Хаҥалас дьаһалтатыгар дьиэ кэргэн бэлиитикэтин сүрүннүүр исписэлиис Пелагея Петровна Прокопьеваҕа, улуус бибилэтиэкэлэрин ситимниир сүрүн бибилэтиэкэ салайааччытыгар Елена Дмитриевна Яковлеваҕа «Дьол уйата» тэрилтэ үлэтин сайдыытыгар сүдү кылааккыт иһин барҕа махталбытын тиэрдэбит.
«Саха сирэ», edersaas.ru сайтка анаан “Дьол уйатын” кэлэктиибэ